Il chantun Grischun ha avert la fanestra da dumonda per cas da direzza per il quart quartal da l'onn 2021. Interpresas grischunas ch'èn stadas influenzadas fermamain da las consequenzas da la pandemia da COVID-19 er il quart quartal 2021, pon ussa inoltrar ina dumonda per cas da direzza per questa fasa.

A partir d'immediat pon interpresas cun ina media da la svieuta annuala da fin 5 milliuns francs, che han fatg durant il quart quartal 2021 tut en tut ina perdita da la svieuta d'almain 15 pertschient e ch'adempleschan las ulteriuras premissas, inoltrar ina dumonda per in sustegn finanzial. Il formular da dumonda sto vegnir inoltrà fin il pli tard ils 15 da matg 2022. Annunzias inoltradas memia tard na vegnan betg resguardadas.

Tut las infurmaziuns impurtantas davart las premissas per inoltrar ina dumonda sco er davart las basas da calculaziun èn da chattar sin la pagina d'internet dal Departament d'economia publica e fatgs socials.

Ulteriuras mesiras per cas da direzza per l'emprim quartal 2022 (Program per cas da direzza 2)
Il chantun è londervi d'elavurar las basas necessarias per realisar il nov Program per cas da direzza 2. La Regenza ha deliberà la missiva correspundenta per mauns dal Cussegl grond. Ulteriuras infurmaziuns en quest connex suondan pli tard.

Ultra da quai ha la Regenza deliberà la missiva per prolungar la protecziun finanziala per occurrenzas publicas ch'èn da muntada surchantunala fin ils 31 da december 2022.

Infurmaziuns:

Responsabladad: Departament d'economia publica e fatgs socials