En il chantun Grischun duain las dumondas da construcziun pudair vegnir inoltradas ed elavuradas en il futur er sin via digitala. Sut la direcziun da l'Uffizi per il svilup dal territori vegn actualmain sviluppada ina plattafurma per ina procedura electronica per la permissiun da construcziun (ePPC). L'introducziun da questa plattafurma è previsa per la fin da l'onn 2023. Las vischnancas sco er las represchentantas ed ils represchentants da las persunas petentas vegnan integrads stretgamain.

Tgi che vul construir, sanar u renovar in edifizi, inoltrescha ina dumonda da construcziun a la vischnanca. Tut tenor il gener e tut tenor la situaziun da l'object planisà cumenzan tras quai differentas proceduras per la permissiun da construcziun. En intginas da questas proceduras èn participads – ultra da las vischnancas – er differents uffizis chantunals a l'examinaziun da la dumonda. Tant per ils patruns da construcziun sco er per ils uffizis communals e chantunals ch'examineschan las dumondas, èn oz ils process respectivs sin palpiri per part fitg pretensius, stentus ed i pon capitar sbagls. Mintga onn vegnan inoltradas tranter 12 000 e 19 000 dumondas da construcziun a las vischnancas grischunas. Var 1600 da questas dumondas pertutgan projects ordaifer la zona da construcziun, sco per exempel stallas, sanaziuns da chasas da vacanzas, indrizs d'ennavar u provediments d'aua.

Pli simpel e pli svelt grazia a soluziun electronica
Per simplifitgar e per accelerar las proceduras per tut las parts participadas vegn actualmain sviluppada – sut la direcziun da l'Uffizi per il svilup dal territori – ina procedura electronica per la permissiun da construcziun (ePPC). Questa procedura permetta da manar las persunas petentas en il futur meglier tras il process da la registraziun da las dumondas. En questa moda po vegnir reducì il dumber da dumondas incumplettas u manglusas. Per ils uffizis communals e chantunals daventi pli simpel da giuditgar las dumondas, perquai che quellas e tut ils documents necessaris vegnan a star a disposiziun en il futur sin via digitala e pon vegnir elavuradas a medem temp da differents posts spezialisads. Il giudicament na po pia betg mo vegnir fatg pli svelt, mabain er en moda pli transparenta.

Pass dal project èn definids
L'urari dal project prevesa d'elavurar in concept cumplessiv fin il proxim atun e d'incumbensar ina interpresa che sviluppa tecnologias d'infurmaziun da realisar la plattafurma electronica. L'introducziun da la plattafurma è planisada per l'atun 2023. Las vischnancas ston lura decider, sch'ellas vulan porscher l'utilisaziun da questa plattafurma a lur abitantas ed abitants. En mintga cas vegnan las persunas petentas però a pudair far las dumondas er en il futur sco fin ussa sin formulars da palpiri. Las experientschas d'auters chantuns che porschan gia ina soluziun correspundenta, mussan dentant che la procedura electronica per la permissiun da construcziun chatta gronda accoglientscha.

Integraziun da las vischnancas e da las persunas petentas en il svilup
Il success da la ePPC dependa dal fatg, sch'ella sa lascha integrar levamain en ils process d'elavuraziun da las vischnancas e sch'ella po vegnir applitgada facilmain da las persunas petentas. Per che quai possia vegnir garantì èn las vischnancas sco er las represchentantas ed ils represchentants da las persunas petentas integrads stretgamain en il svilup. Per quest intent han cumenzà quest onn lavuratoris e tests da prototip.

Part da la Strategia chantunala dad e-government
Il project per sviluppar la ePPC è in element dal plan da realisaziun da la Strategia dad e-government dal Grischun. Cun questa strategia vegnan las vias tras las instanzas digitalisadas pass per pass a favur da la populaziun e da l'economia. En il rom da la realisaziun da la strategia vegn il project ePPC a pudair profitar dal fatg, ch'i vegn stgaffì in portal da servetsch per pudair far diever da tut temp e dapertut da las prestaziuns chantunalas. Plinavant vegn la Strategia dad e-government a crear las premissas tecnicas e giuridicas per permetter en il futur ina correspundenza giuridica digitala.

Tut las infurmaziuns davart il project «Procedura electronica per la permissiun da construcziun» sa chattan sin la pagina d'internet www.ebbv.gr.ch.

Infurmaziuns:

• Omar Selmi, manader dal project ePPC, planisader cirquital tar la partiziun Planisaziun d'utilisaziun ed EOZ, Uffizi per il svilup dal territori, tel. +41 81 257 23 34, e-mail Omar.Selmi@are.gr.ch
• Richard Atzmüller, manader da l'Uffizi per il svilup dal territori, tel. +41 81 257 23 21, e-mail Richard.Atzmueller@are.gr.ch

Responsabladad: Uffizi per il svilup dal territori