La Cumissiun dal Cussegl grond per economia e taxas (CET) recumonda al Cussegl grond d'acceptar la Lescha chantunala COVID‑19 cas da direzza e la Lescha chantunala COVID‑19 eveniments.
Sut il presidi da la presidenta da la cumissiun Carmelia Maissen ed en preschientscha dal president da la Regenza Marcus Caduff, schef dal Departament d'economia publica e fatgs socials, ha la CET predeliberà las missivas da la Regenza tar il relasch d'ina Lescha chantunala davart mesiras per interpresas en cas da direzza en connex cun l'epidemia da COVID‑19 durant l'onn 2022 sco er tar il relasch d'ina Lescha chantunala davart las mesiras concernent las occurrenzas publicas d'impurtanza surchantunala en connex cun l'epidemia da COVID‑19. Ella è entrada unanimamain en omadus projects e recumonda al Cussegl grond – medemamain unanimamain – d'acceptar ils dus projects.
Lescha davart mesiras en cas da direzza per cuntinuar cun il Program per cas da direzza da la Confederaziun
Tar il Program per cas da direzza 1 da la Confederaziun aveva il chantun relaschà in'ordinaziun d'urgenza ch'è stada en vigur fin la fin da l'onn 2021. Il Program per cas da direzza 2 che vala per l'onn 2022 e ch'è vegnì concludì dal Cussegl federal il 1. da favrer 2022, na duai – sin plaun chantunal – betg pli vegnir realisà cun agid d'ina ordinaziun d'urgenza, mabain en il process legislativ ordinari. Sin basa da la situaziun pandemica cuntinuanta e sin basa da las difficultads ch'ella vegn a chaschunar per las interpresas, èsi stà incontestà per la CET da realisar er il Program per cas da direzza 2 en il chantun Grischun.
Protecziun finanziala per occurrenzas publicas d'impurtanza surchantunala
L'Ordinaziun davart las mesiras concernent las occurrenzas publicas ch'il Cussegl federal ha relaschà l'onn passà, ha il chantun medemamain realisà a maun d'ina ordinaziun d'urgenza ch'è anc en vigur fin ils 30 d'avrigl 2022. Er qua ha il Cussegl federal prolungà la valaivladad. Quai premetta però ch'il chantun ageschia, sch'el vul surpigliar vinavant ils custs betg cuvrids per annullaziuns d'occurrenzas publicas en consequenza da la pandemia dal coronavirus. Sco tar ils cas da direzza propona la Regenza da relaschar er qua ina lescha correspundenta. Quai considerescha la CET sco necessari e correct.
Urgenza
Tenor la proposta da la Regenza duain omadus relaschs vegnir declerads sco urgents. Quai vul dir ch'els entran en vigur avant la scadenza dal termin da referendum, perquai che lur realisaziun na permetta nagina suspensiun. Directamain suenter ch'il Cussegl grond ha prendì ils conclus respectivs pon pia per l'ina vegnir garantidas e pajadas contribuziuns per cas da direzza per las perditas da la svieuta a partir dal schaner 2022, per l'autra pon las occurrenzas publicas d'impurtanza surchantunala che han lieu dal matg fin il december 2022 survegnir ina protecziun finanziala. Quest proceder vegn beneventà expressivamain da la CET.
Il Cussegl grond vegn a tractar las duas missivas en la sessiun d'avrigl 2022.
Infurmaziuns:
Presidenta da la cumissiun Carmelia Maissen, Tel. +41 79 713 90 27 (cuntanschibla per telefon tranter las 13.30 e las 15.30)
Responsabladad: Cumissiun per economia e taxas