Per pudair dumagnar las sfidas en connex cun la guerra en l'Ucraina ha la Regenza definì las cumpetenzas dals posts da servetsch chantunals. La Regenza engrazia a la populaziun per la gronda solidaritad e renda a medem temp attent a las prescripziuns en connex cun la collocaziun tar persunas privatas.

Actualmain attribuescha il Secretariat da stadi per migraziun (SEM) al chantun Grischun mintga di circa 30 novas persunas che tschertgan protecziun. Dapi ils 12 da mars 2022 èn quai tut en tut 381 persunas cun status «S» confermà. 263 dad ellas han chattà in refugi tar persunas privatas, 104 èn vegnidas collocadas en structuras collectivas chantunalas (centers da registraziun u centers da transit).

En ses scenari dal mender cas pussaivel («worst case») parta il SEM dal fatg che 250 000 fin 300 000 persunas che tschertgan protecziun pudessan vegnir registradas fin la fin da l'onn en Svizra. La clav naziunala da repartiziun prevesa che la Confederaziun attribuescha en quest cas al chantun Grischun 7500 fin 9000 persunas che tschertgan protecziun (3 pertschient). Var 4500 dad ellas pudessan vegnir alloschadas en structuras collectivas da l'Uffizi da migraziun e da dretg civil (UMDC), var 3000 persunas vegnissan collocadas en abitaziuns privatas ed assistidas tras ils servetschs socials regiunals.

Definì las cumpetenzas da la collavuraziun
Per pudair dumagnar las sfidas en connex cun la collocaziun, cun l'assistenza e cun il sustegn da las persunas che tschertgan protecziun sco er cun l'instrucziun da lur uffants, ha la Regenza definì las cumpetenzas dals posts da servetsch chantunals:

a) Persunas che basegnan protecziun e ch'èn collocadas en structuras collectivas chantunalas vegnan assistidas e sustegnidas tras l'Uffizi da migraziun e da dretg civil dal Grischun.

b) Persunas che basegnan protecziun, che han in document «S» e che han chattà in refugi tar ina famiglia ospitanta u en in'abitaziun privata, vegnan sustegnidas tras il servetsch social chantunal regiunal cumpetent en il sectur da l'agid social persunal ed economic. Il sustegn finanzial vegn prestà directamain tras il servetsch social regiunal. Uschia na resultan nagins custs supplementars per las vischnancas: Il chantun surpiglia ils custs per la cussegliaziun sociala sco er per il sustegn finanzial da questa gruppa da persunas.

c) Persunas che n'han betg in document «S» (visum turistic da 90 dis) e ch'èn collocadas tar ina famiglia ospitanta u en in'abitaziun privata, vegnan sustegnidas tras il servetsch social chantunal regiunal cumpetent en il sectur da la cussegliaziun sociala persunala. Ils custs per l'alloschi e per l'ulteriur sustegn finanzial van cumplainamain a quint da las persunas che basegnan protecziun respectivamain da la famiglia ospitanta privata, e quai almain fin a la concessiun dal status da protecziun «S». Sch'i dovra tuttina in sustegn finanzial, vegn quel pajà da la vischnanca en furma da l'agid d'urgenza. Sco alternativa stattan ils centers federals d'asil a disposiziun per la dunsena e per l'alloschi.

A las persunas che tschertgan protecziun vegni vinavant recumandà d'inoltrar uschè svelt sco pussaivel ina dumonda al SEM. Suenter l'inoltraziun da la dumonda al SEM survegnan ellas in termin da registraziun en in center federal d'asil.

d) L'instrucziun d'uffants e da giuvenils che n'èn betg collocads en in alloschi collectiv dal chantun ha lieu en las vischnancas da domicil correspundentas da las persunas che tschertgan protecziun. La cumpetenza chantunala ha l'Uffizi per la scola populara ed il sport.

e) Las incumbensas en il sectur da la protecziun da la populaziun (exposiziun a radioactivitad, locals da protecziun e.u.v.) èn en la cumpetenza da l'Uffizi da militar e da protecziun civila (UMPC). Il UMPC sustegna plinavant ils posts da servetsch tar la coordinaziun e tar la realisaziun da mesiras.

Per realisar las incumbensas en connex cun las consequenzas da la guerra en l'Ucraina dumonda la Regenza la Cumissiun da gestiun sis credits posteriurs da totalmain var 53 milliuns francs brutto; da questa summa vegn la Confederaziun previsiblamain a surpigliar var 40 milliuns francs.

Iniziativas privatas duain vegnir coordinadas cun las autoritads
L'alloschament e la convivenza d'umans che na s'enconuschan betg po esser ina sfida per tuttas duas varts. Fugitivas e fugitivs pateschan savens da chargias multiplas, quai che po engrevgiar supplementarmain la convivenza. La decisiun da dar albiert tar sai a chasa a persunas na duess perquai betg vegnir prendida a la svelta e duess vegnir discutada bain cun tut las persunas involvidas. Betg mintga furma da collocaziun n'è adattada per dar alloschi a persunas che tschertgan protecziun. Impurtant èsi cunzunt da garantir che l'alloschament possia vegnir occupà durant almain 3 mais sco er ch'i saja avant maun almain ina chombra da durmir serrabla cun fanestra.

Per evitar tant sco pussaivel grevezzas supplementaras per las persunas che porschan protecziun, per las persunas che tschertgan protecziun sco er per las vischnancas, renda il chantun attent che acziuns d'immigraziun e da collocaziun da famiglias grondas e da gruppas da 10 persunas e dapli – che vegnan planisadas sin iniziativa privata – duain en mintga cas vegnir coordinadas ordavant cun las autoritads chantunalas.

Contacts ed infurmaziuns impurtantas sco er respostas a dumondas frequentas en connex cun la collocaziun e cun l'assistenza da persunas che tschertgan protecziun vegnan publitgadas cuntinuadamain sin la plattafurma d'infurmaziun www.gr.ch/ucraina.

Attenziun en cas da malsognas
En l'Ucraina sco er en la Russia è la tuberculosa (TB), ch'è ina malsogna contagiusa, fitg derasada. Las famiglias ospitantas vegnan rendidas attentas che lur giasts duain ir immediatamain tar ina media u in medi, sch'els han in dals suandants sintoms: tuss, stancladad, leva fevra, suadas durant la notg, reducziun dal pais, mancanza d'appetit u dolurs en il pèz. Uschia po vegnir fatga svelt ina diagnosa ed introducida in'eventuala terapia.

Plinavant ston tut ils animals da chasa che vegnan purtads or da l'Ucraina en Svizra, vegnir registrads a chaschun da l'arrivada e vegnir controllads, sch'els èn vaccinads cunter la frenesia. Chauns e giats che n'èn betg vaccinads u nua ch'i dat dubis, sch'els èn vaccinads, vegnan vaccinads posteriuramain. Persunas che entran en Svizra cun in animal da l'Ucraina vegnan supplitgadas d'emplenir il formular d'annunzia.

La Regenza engrazia per la solidaritad vivida
La Regenza renconuscha la gronda solidaritad da la populaziun ed engrazia a las Grischunas ed als Grischuns per il sustegn da las persunas che tschertgan protecziun. Cuminaivlamain èsi pussaivel da dumagnar las sfidas dals proxims mais.

Infurmaziuns:

Post da communicaziun Ucraina dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)

Responsabladad: Regenza