En il Grischun han 15 bibliotecaras ed in bibliotecar absolvì per l'emprima giada il curs da certificaziun grischun ed han obtegnì il certificat da la federaziun professiunala Bibliosuisse.

Las absolventas e l'absolvent dal curs da certificaziun grischun èn las emprimas bibliotecaras e l'emprim bibliotecar insumma cun in certificat da Bibliosuisse en il Grischun. Ed er sin plaun federal tutgan els tar ils emprims che han absolvì questa scolaziun. Il curs da certificaziun grischun è il successur dal curs da basa da la CLP, la Cuminanza da lavur da las bibliotecas svizras da lectura publica, ch'è vegnì surlavurà areguard la furma ed il cuntegn ed adattà als svilups actuals en il sectur da las bibliotecas publicas. Ils ultims diesch onns han 85 persunas absolvì cun success il curs da basa grischun da la CLP. Il chantun Grischun è in da totalmain sis chantuns da la Svizra tudestga che porschan quest curs.

Las passa 60 bibliotecas da scola e da vischnanca dal Grischun permettan a lur visitadras e visitaders in access a medias stampadas e digitalas, promovan la cumpetenza d'infurmaziun ed intermedieschan co utilisar las medias digitalas. Passa 50 000 persunas visitan regularmain las bibliotecas en il chantun Grischun. Cun lur purschidas simplas, nunbirocraticas e publicas senza sforz da consum èn ellas in lieu da savida e d'attracziun per blers umans da differentas generaziuns e da divers circuls socials. Ina furmaziun supplementara fundada dal persunal bibliotecar è da muntada essenziala. Las absolventas ed ils absolvents dal Grischun, da Sviz e da la Svizra Orientala acquistan – grazia al perfecziunament che sa basa sin experientschas praticas – qualificaziuns spezialisadas cumprovadas che permettan ad ellas ed els da lavurar en ina biblioteca publica.

Survegnì in certificat han las suandantas persunas:
Bartelt Janine, Leihbibliothek Davos; Bonifazi Jutta, Gemeinde- und Schulbibliothek Arosa; Burlet Christine, Mediothek Lachen; Cajöri Karin, Gemeindebibliothek Domat/Ems; Elsener Sandra, Schul- und Gemeindebibliothek Untervaz; Goll Gabriela, Kirchliche Mediothek Chur; Gubser Sandra, Gemeindebibliothek Bad Ragaz; Kindle Fabian, Bibliothek des Liechtensteinischen Gymnasiums; Luzzi Reta, Biblioteca populara Valsot; Pfister Magdalen, Schul- und Gemeindebibliothek Ilanz/Glion; Pircher Sandra, Schul- und Gemeindebibliothek Obervaz/Lenzerheide; Schlatter Karin, Schul- und Gemeindebibliothek Ilanz/Glion; Schmid Melanie, Gemeindebibliothek Klosters; Senn Stefanie, Leihbibliothek Davos; Tschupp Müller Manuela, Schul- und Gemeindebibliothek Untervaz; Zweifel Barbara, Bibliothek Kerenzen

Fotografia agiuntada:

Infurmaziuns:

Olivia Fehlmann, Incumbensada da las bibliotecas dal chantun Grischun, tel. +41 81 257 28 37, e‑mail Olivia.Fehlmann@kbg.gr.ch

Responsabladad: Uffizi da cultura / Biblioteca chantunala