Per realisar in nov edifizi da perscrutaziun sin l'areal da la clinica alpina da Tavau Wolfgang ha la Regenza concedì a la Kühne Real Estate SA ina contribuziun chantunala da maximalmain 3,2 milliuns francs. Per il project «Realisaziun da l'edifizi da perscrutaziun II» èn budgetads custs totals da 19,95 milliuns francs. La contribuziun chantunala vegn pajada a norma da la basa legala «infrastructuras relevantas per il sistem». Cun 650 000 francs sa participescha er la vischnanca da Tavau a la finanziaziun dal project.

Tras il nov edifizi da perscrutaziun fa il campus da medischina a Tavau in ulteriur pass en direcziun d'in center da cumpetenzas internaziunal impurtant per la perscrutaziun medicinala e per la scolaziun. La collavuraziun intensiva existenta tranter la clinica, la perscrutaziun e la scolaziun sin l'areal da la clinica alpina da Tavau Wolfgang vegn uschia rinforzada ed approfundada ulteriuramain. Ultra da quai vegnan las activitads clinicas e scientificas al lieu da perscrutaziun Tavau garantidas a lunga vista grazia a l'engaschament da la gruppa Kühne. Quest project augmenta l'attractivitad, la cumpetitivitad e la capacitad d'innovaziun da la regiun Partenz/Tavau e da l'entir chantun Grischun e promova la creaziun da novas plazzas da lavur. Tras la nova infrastructura duain vegnir creadas entaifer ils proxims 10 onns almain 45 novas plazzas da lavur fitg qualifitgadas sin quest areal.

Sin basa da l'obligaziun da sanaziun che vala per ils possessurs da stabiliments da traffic, han l'Uffizi da construcziun bassa dal Grischun sco er las vischnancas da Landquart e da Zizers laschà elavurar projects da sanaziun cunter la canera per las vias chantunalas e communalas en las vischnancas respectivas. Pervia dals surpassaments da las limitas vegnan introducidas mesiras per reducir la canera. D'ina vart vegn reducida la sveltezza da tempo 60 a tempo 50 respectivamain da tempo 50 u 40 a tempo 30 per lung da las vias chantunalas e communalas examinadas. Da l'autra vegnan las cuvridas veglias da tscherts trajects remplazzadas en etappas tras la cuvrida da standard ch'è previsa normalmain ozendi. Plinavant vegnan concedidas facilitaziuns da l'obligaziun da sanaziun.

En la publicaziun da l'introducziun da tempo 30 per motivs da la protecziun cunter la canera vegn integrada il medem mument l'introducziun da tempo 30 per motivs da segirezza sin la Stationsstrasse e sin la Kreuzwiesenstrasse en la fracziun dad Igis. Tras la realisaziun dals projects da sanaziun cunter la canera e tras l'introducziun da tempo 30 per motivs da segirezza resulta en las vischnancas da Landquart e da Zizers ina zona da tempo 30 per in territori coerent. Quai augmenta la qualitad da viver sco er la segirezza stradala.

Cun intginas cundiziuns e permissiuns ha la Regenza approvà il project da las vischnancas da Tschappina, Urmagn, Flearda, Cazas, Masagn, Tusaun e Seglias per construir rempars per la Nolla. La Nolla maina las auas da la costa ost dal Piz Beverin sco er da las spundas sidvest da la Mantogna vers Tusaun en il Rain Posteriur. Il sutterren da l'intschess consista da plattamorta grischuna, pia da sediments alternants da plattì d'arschiglia e da plattì marnus. Cunquai che la configuraziun dal sutterren è suttaposta fermamain a la dischagregaziun, n'han las costas da la val mai paus. Perquai valeva la Nolla durant lungs temps sco in dals torrents ils pli privlus da la Svizra. Ils rempars existents vegnan inspectads regularmain. En il rom da questas controllas èsi sa mussà che sis traversas dal torrent èn donnegiadas sin il traject che ha ina lunghezza da var 1,9 kilometers. Per pudair garantir la segirezza en cas d'aua gronda en la part sut dal torrent er en il futur, ston quests donns vegnir reparads.

Als custs totals da var 4 milliuns francs sa participeschan il chantun e la Confederaziun tenor la cunvegna da program da la NGF (nova gulivaziun da finanzas) en il sectur «ovras da protecziun cunter l'aua». La contribuziun chantunala tenor la Lescha davart la correcziun dals curs d'aua importa 800 000 francs. Tras il project da rempars vegn protegida er la via da la Mantogna Dadens. Perquai paja il chantun supplementarmain ina contribuziun da 180 000 francs per la construcziun da vias.

La Regenza ha approvà il project «Chamona da guaud Crappasusta» da l'associaziun burgaisa Tusaun ed ha concedì ina contribuziun unica da 30 000 francs per quest project. Il project «Chamona da guaud Crappasusta» cumpiglia la realisaziun d'in edifizi da lain cun in'utilisaziun per differents intents, principalmain en il sectur da la lavur da publicitad forestala. En questa funcziun serva la chamona da guaud sco lieu da scolaziun e da furmaziun supplementara per professiuns forestalas, per scolas, per uniuns, per organisaziuns e per ulteriuras persunas che s'interessan per il guaud. Las utilisadras ed ils utilisaders da la «Chamona da guaud Crappasusta» duain vegnir sensibilisads per ils temas guaud, natira e cuntrada. La chamona stat dentant er a disposiziun ad autoritads, a firmas, a societads ed a persunas privatas e sco lieu da dieta per occurrenzas socialas e culturalas.

La chamona vegn a disponer d'in grond local avert e central cun grondas fanestras. Questa sala duai vegnir extendida tras ina terrassa cuverta. Ultra da la sala èsi planisà ina cuschina ed in deposit. En ina part separada da l'edifizi duain sa chattar las tualettas, la tecnica sco er in deposit da pellets. La mantellada duai vegnir construida cun lain-laresch da glina che deriva da Tusaun. Sche pussaivel vegn realisà er l'equipament interiur cun lain indigen. La chamona vegn stgaudada cun ina pigna da pellets.

©Fiba Holzbau SA

La Regenza ha mess en vigur la revisiun parziala da la Lescha davart ils dretgs politics (votaziun per correspundenza senza custs da porto) per il 1. da zercladur 2022.

Tras las midadas vegn la votaziun per correspundenza sin via postala ad esser gratuita per las votantas ed ils votants a partir dal termin da votaziun dal settember 2022. Ils custs da porto vegnan surpigliads dal chantun. Uschia duai vegnir augmentada la participaziun a las votaziuns ed a las elecziuns.