Cun intginas cundiziuns e permissiuns ha la Regenza approvà il project da la vischnanca da Schiers per construir rempars per il Schraubach. Il Schraubach valeva ditg sco in dals torrents ils pli privlus dal Partenz. Gia l'onn 1910 han ins cumenzà a construir sistematicamain rempars sin ils trajects ch'èn predisposts ad erosiuns. Dapi lura è il sistem da rempars vegnì amplifitgà e renovà periodicamain.

En il rom da las inspecziuns regularas èsi sa mussà, ch'ils rempars existents èn donnegiads en il territori, nua ch'il Schraubach sbucca en la Landquart. Per pudair garantir la protecziun cunter aua gronda er en l'avegnir, ston vegnir eliminads differents donns vi da quests rempars. Als custs totals da 530 000 francs sa participeschan il chantun e la Confederaziun tenor la cunvegna da program da la NGF (nova gulivaziun da finanzas) en il sectur «ovras da protecziun cunter l'aua». La contribuziun chantunala tenor la Lescha davart la correcziun dals curs d'aua importa 106 000 francs. Il project per la correcziun da l'aual protegia er la via da la Chlus e la via da Stels. Perquai paja il chantun supplementarmain ina contribuziun per la construcziun da vias da 23 850 francs.

La Regenza ha approvà il project d'exposiziun per renovar la via da Verdabbio a Grono. La via da Verdabbio è ina via chantunala da colliaziun che sa sparta a Grono da la via taliana e dat access a la fracziun Verdabbio da la vischnanca da Grono. Il trassé actual da la via datescha dal cumenzament dals onns 1960. En spezial il traject da via tranter Grono e Fontanèl è en in nausch stadi.

En il rom dal project duain vegnir installads novs conducts d'ovra, renovads ils mirs e construids passapes charrabels sin ina lunghezza da 635 meters da quest traject da via. Supplementarmain duai vegnir curregì l'access a la via taliana per augmentar la segirezza per il traffic sin via sco er per las pedunas ed ils peduns. Ils custs totals per il project importan circa 3 milliuns francs.

Suenter che la via è vegnida renovada, po il pais maximal permess sin la via d'Avras – tranter la punt Parsagna ed Avras Cresta – vegnir augmentà dad oz 28 tonnas sin da nov 32 tonnas. Las mesiras entran en vigur cun l'adattaziun da la signalisaziun correspundenta.

La Regenza ha concedì ina contribuziun chantunala da 75 000 francs a la vischnanca da Domat per il project da revalitar la cultira «Vegna», quai en il rom da la cunvegna da program «cuntrada». Ultra da quai sa participescha la Confederaziun cun ina contribuziun da la medema autezza. La cultira «Vegna» è caracterisada da mirs sitgs impurtants per la cuntrada.

Quest areal è vegnì duvrà fin l'onn 1875 sco vigna. Dapi lura n'è el strusch vegnì cultivà. En il territori expost al sulegl han pudì sa sviluppar spazis da viver extraordinaris. Tras la cultira passa in traject d'ina senda che figurescha en l'Inventari da las vias da communicaziun istoricas. En il rom dal project duai la senda istorica cun mirs sitgs vegnir restaurada. Uschia duai questa diversitad unica vegnir fatga accessibla cun agid d'infurmaziuns ecologicas ed istoric-culturalas a la populaziun ed a las persunas che tschertgan recreaziun. La revalitaziun da la cultira vegn realisada en etappas. Ils onns 2022 fin 2024 duain vegnir restauradas en in'emprima etappa la senda istorica ed ils mirs sitgs per lung da la senda. Alura duai vegnir restabilì e revalità en duas ulteriuras etappas l'areal dals mirs sitgs «Vegna» e ses spazis da viver prezius.

Sin dumonda da l'organisaziun per la promoziun da la vendita graubündenVIEH SA vegn la promoziun da la vendita e da la commerzialisaziun da muvel da niz e da maz en il Grischun concludida mintga onn da la Regenza. Ella fixescha differentas mesiras voluminusas e contribuziuns per activitads da reclama e garantescha mesiras che distgargian il martgà sco er autras facilitaziuns per las puras ed ils purs. D'ina vart vegn la graubündenVIEH SA indemnisada cun ina contribuziun da 40 respectivamain da 5 francs per animal per organisar e per realisar ils martgads publics d'arments, da nursas e da chauras da maz sco er cun ina contribuziun pauschala da 125 000 francs per manar ina structura da marketing professiunala e per realisar activitads da reclama. Da l'autra vart vegnan pajadas a las puras ed als purs contribuziuns da maximalmain 84 000 francs per promover la vendita da nursas e da chauras, e cun maximalmain 84 000 francs vegn sustegnì il servetsch da transport e da preschentaziun per promover ils martgads publics e per cumpensar las distanzas da transport ch'èn differentas tut tenor la regiun.