Oz cumenza la stagiun da construcziun 2022. Sin e vid las vias chantunalas èn previs tut en tut 168 plazzals quest onn. Sin 77 plazzals vegn il traffic reglà cun agid dad amplas.

La stagiun da construcziun è curta en il chantun Grischun. Ella cumenza suenter Pasca e dura fin tard l'atun. La fin da la stagiun dependa da las cundiziuns meteorologicas e na po perquai betg vegnir planisada exactamain. Plazzals chaschunan savens restricziuns da traffic. Per quest motiv vegnan las lavurs planisadas uschia, che las restricziuns èn uschè minimalas sco pussaivel, particularmain durant il temp da vacanzas principal.

Main plazzals ch'ils onns precedents
En cumparegliaziun cun ils onns precedents resorti, che durant l'onn 2022 èn planisads main plazzals ch'en la media dals ultims 5 onns. Quai principalmain perquai ch'ils singuls plazzals daventan pli e pli cumplexs. Correspundentamain dovri dapli resursas per lur projectaziun e per lur realisaziun. Ils voluminus projects da vias principalas che cumenzan quest onn, èn la correcziun da la via tranter Balamburtg e la chavorgia da la Roffla, la renovaziun dal traject da la via dal Bernina tranter Pozzolascio e Pisciadel sco er da la via dal Güglia tranter Grosskehrrank e Malix.

Lavurs da mantegniment e nettegiament da tunnels
En ils projects da renovaziun che cumpiglian per il solit in'adattaziun dal trassé e/u dal profil da la via, chaschunan ils projects dal mantegniment architectonic intervenziuns main fermas. Perquai na custan els betg exnum damain. Betg da sutvalitar n'èn er las lavurs da nettegiament dals tunnels. Sch'i ston vegnir realisadas a medem temp lavurs da mantegniment vid ils stabiliments electromecanics, ston ils tunnels vegnir serrads durant quest temp. Per quest motiv vegnan questas lavurs fatgas en emprima lingia durant la notg e repartidas sur l'entir onn.

Cumportament correct en ils conturns dals plazzals
La segirezza dals lavurants sin ils plazzals ha l'emprima prioritad. Elements impurtants èn ch'ins observia las disposiziuns per la protecziun dals lavurants, ch'èn generalmain valaivlas, ed en spezial che las participantas ed ils participants dal traffic resguardian las activitads sin ils plazzals. L'Uffizi da construcziun bassa sco er las interpresas da construcziun supplitgeschan las participantas ed ils participants dal traffic da passar il plazzal a sveltezza adattada sco er en ina distanza suffizienta da las barrieras. Medemamain duain ellas ed els augmentar lur attenziun al passadi, per pudair reagir immediatamain ad eveniments imprevis. Las participantas ed ils participants dal traffic ston ultra da quai observar las ordinaziuns dal persunal dals plazzals e dals servetschs da traffic.

Tut las infurmaziuns davart ils impediments da traffic
Sin www.strassen.gr.ch stattan a disposiziun las chartas dals plazzals. Quellas vegnan actualisadas permanentamain e cuntegnan las indicaziuns detagliadas davart las lavurs e davart las restricziuns. L'Uffizi da construcziun bassa sco er las interpresas engrazian tut las participantas ed ils participants dal traffic per lur resguard e per lur chapientscha.

Fotografia agiuntada:

Agiunta:

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01, e-mail Reto.Knuchel@tba.gr.ch
• Christian Kaufmann, responsabel per las medias a.i., Uffizi da construcziun bassa, tel. +41 81 257 37 14, e-mail Christian.Kaufmann@tba.gr.ch

Responsabladad: Uffizi da construcziun bassa