13 scolaras e scolars da la 5avla e 6avla classa da la scola primara da Sent han visità oz l'avertura da la sessiun da primavaira dal Cussegl grond a Cuira. Suenter èn ellas ed els sa scuntrads cun il cusseglier guvernativ Jon Domenic Parolini per ina marenda.

Suenter il cumenzament da la sessiun ha il cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, prendì peda per in barat cun las scolaras ed ils scolars da scola primara da l'Engiadina Bassa. Ina visita en la Chasa grischa suandada d'ina marenda en il Tschaler da la Chasa grischa han cumplettà l'inscunter interessant. «Ina giada dapli hai jau pudì far l'experientscha, quant viv ch'il barat d'opiniuns cun giuvenils è e tge enritgiment che quel è», ha ditg il cusseglier guvernativ Parolini davart l'inscunter ed agiuntà: «In pèr da lur dumondas davart l'actualitad politica m'han impressiunà.»

Quest inscunter da la generaziun giuvna cun la politica ha mussà en moda exemplarica, co che l'occupaziun cun la furmaziun politica po vegnir concepida en la scola populara. En questa moda vegnan ils temas politics promovids en scola – supplementarmain als cuntegns teoretics – er cun intervenziuns praticas. Uffants e giuvenils obtegnan uschia ina chapientscha palpabla e viva dals process democratics.

Fotografia agiuntada:

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch

Responsabladad: Departament d'educaziun, cultura e protecziun da l'ambient