Il mars 2022 èn il chantun e la Confederaziun vegnids confruntads cun ina situaziun cumplettamain nova: l'alloschament da millis da fugitivas e fugitivs da l'Ucraina. Dapi ils 12 da mars 2022 ha il Grischun retschavì 854 persunas che tschertgan protecziun. Quai èn cleramain dapli che durant la crisa dal Cosovo (1998/1999) u durant l'unda da fugitivs l'onn 2015. La dimensiun dal dumber da fugitivas e fugitivs or da l'Ucraina chaschuna ulteriuras sfidas per il chantun. El examinescha perquai cuntinuadamain d'augmentar las capacitads en ils alloschis collectivs.

Sche las dispitas da guerra en l'Ucraina avessan da cuntinuar, mussan divers scenaris da la Confederaziun, ch'i pudessan vegnir attribuidas fin la fin da l'onn 2022 al chantun Grischun fin 7500 persunas da l'Ucraina sco persunas che basegnan protecziun cun il status da dimora «S».

Durant las ultimas sis emnas ha il chantun Grischun retschavì 854 persunas cun in status «S» confermà. Ultra da quai registrescha l'Uffizi da migraziun e da dretg civil (UMDC) ulteriuras 150 requirentas e requirents d'asil dapi il cumenzament da l'onn. Quai èn cleramain dapli che durant la crisa dal Cosovo ils onns 1998 e 1999 (1028, resp. 1155 requirentas e requirents d'asil per onn) u durant l'unda da fugitivs l'onn 2015 cun 1124 requirentas e requirents d'asil.

30 giadas dapli attribuziuns tras la Confederaziun
Las structuras dal mintgadi dal UMDC èn concepidas per 250 fin 400 attribuziuns tras la Confederaziun. Quai correspunda a circa 30 attribuziuns per mais. Pervia da la guerra en l'Ucraina èn quai actualmain però var 30 attribuziuns per di.

Da las persunas che tschertgan protecziun da l'Ucraina chattan actualmain 142 persunas refugi en ina da las structuras collectivas chantunalas. 712 persunas èn alloschadas tar persunas privatas u tar famiglias ospitantas. Actualmain han las structuras collectivas circa 186 letgs libers. Per quest motiv planisescha il UMDC d'augmentar las capacitads: La stad duain star a disposiziun 1700 letgs en alloschis collectivs e circa 500 unitads d'abitar per l'alloschament individual.

Las vischnancas vegnan supplitgadas urgentamain da sustegnair il chantun en connex cun l'alloschament da persunas che tschertgan protecziun e d'annunziar al chantun abitaziuns disponiblas ed alloschis adattads (a partir da 35 persunas).

Ils servetschs socials regiunals sustegnan persunas che basegnan protecziun cun il status da dimora «S»
Pervia dal grond dumber da persunas ha la Regenza decidì ils 5 d'avrigl 2022, che las persunas che basegnan protecziun cun il status da dimora «S» pon vegnir alloschadas er en abitaziuns da locaziun u tar famiglias ospitantas, ultra dals alloschis collectivs chantunals.

Persunas cun il status da protecziun «S», ch'èn alloschadas en abitaziuns da locaziun u tar famiglias ospitantas, vegnan cussegliadas e sustegnidas dals servetschs socials regiunals. Da princip vali:

• Las persunas cun status da protecziun «S» vegnan – sche necessari – sustegnidas finanzialmain dal chantun tras l'agid social d'asil. L'agid social d'asil segirescha l'existenza da las persunas pertutgadas. L'autezza da quel è pli bass che las prestaziuns d'agid social per la populaziun indigena.
  
• Il sustegn finanzial s'orientescha a las Directivas da la Conferenza svizra da l'agid social COSAS e sa cumpona d'in basegn fundamental, dal tschains da locaziun, da la cassa da malsauns sco er da prestaziuns liadas a la situaziun. Per las persunas dal sectur d'asil vegn il basegn fundamental reducì per 20%.
  
• Per persunas cun il status da dimora «S» ch'abitan tar famiglias ospitantas è il tschains da locaziun limità a 200 francs per persuna, maximalmain dentant a 200 francs per stanza ch'ins po serrar.
  

Purschidas per promover d'emprender la lingua
Anc ussa èsi difficil da stimar, quant ditg che las fugitivas ed ils fugitivs da l'Ucraina vegnan a restar en Svizra. Igl è da partir da differents scenaris (cuntinuaziun dal viadi, segiurn temporar e restar en Svizra). Independentamain da quai duain las persunas cun status «S» en il chantun Grischun survegnir ina purschida da mesiras da sustegn svelta e nuncumplitgada per dumagnar il mintgadi. En ina emprima fasa ha la pussaivladad d'emprender la lingua prioritad. Per quest intent pon ins far diever da las structuras existentas dal Post spezialisà per l'integraziun.

Persunas cun il status da protecziun «S» survegnan la pussaivladad da frequentar in curs da tudestg finanzià. Ils posts cumpetents vegnan ils proxims dis a contactar en scrit las persunas che tschertgan protecziun registradas e las infurmar davart occurrenzas d'infurmaziun e davart pussaivladads. Suenter in test da classificaziun linguistic èn planisads a partir da mez matg 2022 emprimas purschidas per promover d'emprender la lingua per persunas creschidas. Ulteriuras infurmaziuns davart la promoziun linguistica da persunas cun status «S» sco er respostas a dumondas frequentas vegnan publitgadas cuntinuadamain sin la pagina d'internet www.gr.ch/ukraine.

Ultra da quai è il Post da communicaziun Ucraina cuntanschibel durant las uras da biro per e-mail ukraine@amz.gr.ch u per telefon +41 81 257 83 03.

Agiunta:

Preschentaziun conferenza da medias (mo per tudestg)

Infurmaziuns:

Post da communicaziun Ucraina dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)

Responsabladad: Uffizi da migraziun e da dretg civil dal Grischun