La Cumissiun dal Cussegl grond per economia e taxas (CET) ha predeliberà la missiva da la Regenza davart la contribuziun a la realisaziun dals Special Olympics World Winter Games Switzerland 2029 e recumonda unanimamain al Cussegl grond d'acceptar il credit da 9,5 milliuns francs.
Tar ils Special Olympics sa tracti da concurrenzas sportivas da persunas cun in impediment spiertal che han lieu mintga 4 onns. Las concurrenzas èn uschia in pendant als paralimpics, als quals persunas cun impediments corporals cumbattan per medaglias, quai mintgamai 2 emnas suenter ils gieus olimpics da stad u d'enviern.
In ferm segn per persunas cun impediments
La sesida predeliberanta ha gì lieu sut la direcziun da la presidenta da la cumissiun, Carmelia Maissen, ed en preschientscha dal president da la Regenza, Marcus Caduff, schef dal Departament d'economia publica e fatgs socials. Ils Special Olympics World Winter Games valan suenter ils gieus olimpics d'enviern sco occurrenza da sport d'enviern la pli gronda dal mund. Durant 12 dis sa mesiran var 3100 participantas e participants da passa 100 naziuns en nov differentas disciplinas. Ils custs da l'occurrenza importan 38 milliuns francs. Il chantun Grischun duai sa participar a quests custs cun maximalmain 9,5 milliuns francs. Ulteriuras contribuziuns èn gia vegnidas concedidas dals lieus da concurrenza Cuira, Arosa e Lai. Dentant er la Confederaziun ed il chantun sco er la citad da Turitg, nua che la festa d'avertura duai avair lieu, vegnan anc a decider en il decurs da l'onn davart contribuziuns.
Il Grischun ha uschia la schanza da sa preschentar sco ospitant sin plaun naziunal ed internaziunal e da mussar respect e stima envers persunas cun in impediment sco er da metter in signal per l'inclusiun da questas persunas. La cumissiun è persvadida che l'occurrenza vegn ad esser in gudogn persistent per il Grischun. Premess ch'il Cussegl grond sco er las ulteriuras parts participadas delibereschian lur credits, avessan ils World Winter Games 2029 per l'emprima giada lieu en Svizra.
Il Cussegl grond vegn a tractar la missiva en la sessiun da zercladur 2022.
Infurmaziuns:
Presidenta da la cumissiun dr. Carmelia Maissen, tel. +41 79 713 90 27 (cuntanschibla per telefon tranter las 09.00 e las 12.00)
Responsabladad: Cussegl grond / Cumissiun per economia e taxas