La Regenza ha approvà il project «Rempars da lavinas Frauentobel» a Tavau Frauenkirch. Ultra da quai ha ella dà glisch verda per il «Project da protecziun cunter crudada da crappa Robbia» a Puschlav.
Ils rempars da lavinas Frauentobel a Tavau vegnan amplifitgads
La Regenza ha approvà il project «Rempars da lavinas Frauentobel» da la vischnanca da Tavau ed ha deliberà per quest intent ina contribuziun chantunala da maximalmain 2,46 milliuns francs. Ultra da quai vegn approvada ina contribuziun chantunala supplementara da maximalmain 73 600 francs tenor la Lescha davart las vias.
Tranter l'onn 1602 e l'onn 2019 èn sa distatgadas 18 lavinas en il territori da Frauentobel sur l'abitadi da Tavau Frauenkirch. Sis da questas lavinas han chaschunà tut en tut 13 mortoris. Dapi l'onn 1951 vegnan siglientadas lavinas en il Frauentobel. L'emprim faschevan ins quai cun bittaminas, pli tard alura cun chargias explosivas or da l'helicopter. L'onn 2011 è quest sistem vegnì remplazzà en la part davos dal Frauentobel tras quatter indrizs fixs per siglientar lavinas. Cunquai che quests indrizs fixs èn sa cumprovads, vegn ussa planisà il medem sistem per la part davant dal Frauentobel. Il potenzial da donns è considerabel er en la part davant da la val. Ultra dal territori d'abitadi èn pertutgadas la via chantunala sco er – sche las lavinas èn fitg grondas – la Viafier retica. Il project qua avant maun prevesa da construir 13 retschas da rempars da lavinas permanents d'ina lunghezza totala da 770 meters. En l'areal Staflermeder Sid èn planisadas supplementarmain duas retschas da rempars da lavinas temporars da 213 meters sco er emplantaziuns da guaud. Il project vegn realisà en trais etappas da construcziun e custa totalmain 3,2 milliuns francs.
La Regenza ha approvà il project «Rempars da lavinas Frauentobel» da la vischnanca da Tavau ed ha deliberà per quest intent ina contribuziun chantunala da maximalmain 2,46 milliuns francs.
Glisch verda per il project «Protecziun cunter crudada da crappa Robbia» a Puschlav
La Regenza ha approvà il project «Protecziun cunter crudada da crappa Robbia» da la Repower SA e da la Swissgrid SA ed ha deliberà per quest intent ina contribuziun chantunala da maximalmain 742 500 francs.
En il rom dal project duain vegnir protegids l'areal da l'ovra electrica Robbia e la parcella cunfinanta da la Swissgrid SA sco er il conduct da pressiun cun tut en tut quatter raits cunter crudada da crappa. Questas raits han ina lunghezza da 20 fin 66 meters, ina autezza da 4 fin 6 meters ed ina capacitad d'absorbar energia da 1000 fin 8000 kilojoule. Il project vegn realisà en ina etappa da construcziun ed è budgetà cun var 990 000 francs. El duai vegnir terminà l'onn 2023.
La Regenza ha approvà il project «Protecziun cunter crudada da crappa Robbia» da la Repower SA e da la Swissgrid SA ed ha deliberà per quest intent ina contribuziun chantunala da maximalmain 742 500 francs.
