La Regenza ha approvà in project da la vischnanca da Bregaglia che duai meglierar l'infrastructura dal cumbat cunter incendis da guaud. Ultra da quai ha ella concedì contribuziuns chantunalas per la sanaziun dal Lavuratori d'emprendissadi engiadinais a Samedan e per centers grischuns da sport da prestaziun.
Soglio sa prepara per ina ristga pli gronda d'incendis da guaud
La Regenza ha approvà il project «Cumbat cunter incendis da guaud Soglio» da la vischnanca da Bregaglia ed ha deliberà ina contribuziun chantunala da maximalmain 368 000 francs per quest intent.
Cun quest project vul la vischnanca da Bregaglia eliminar ils deficits ch'èn vegnids constatads da la vart dretga da la val tar l'infrastructura dal cumbat cunter incendis da guaud. Ils guauds sa chattan en territoris stips e fitg sitgs ch'èn exponids vers sid. Per part n'han els nagin access u èn accessibels mo malamain. En il territori dal project n'existan plinavant nagins lieus da retratga d'aua natirals, sco lais u auals, che permettessan da retrair aua da stizzar fieu cun agid da helicopters, d'autos-cisterna u da pumpas.
Sco mesira principala cumpiglia il project la construcziun d'in batschigl d'aua da stizzar fieu cun reservuar en il territori da Tombal sur Soglio. Ultra da quai èn previs dus idrants d'aua da stizzar fieu a Plän Vest ed a Soglio sco er in attatg a l'aua da stizzar fieu tar il reservuar Flin Plazza. Las mesiras proponidas correspundan al Concept chantunal da prevenziun cunter incendis da guaud 2030. L'execuziun dal project forestal dura 2 onns. Ils custs totals èn calculads cun 460 000 francs.
![Foto Soglio](/DE/Medien/Mitteilungen/MMStaka/2022/PublishingImages/Foto%20Projekt%20Waldbrandbekämpfung%20Soglio__w_1200__h_0.JPG)
La Regenza ha approvà il project «Cumbat cunter incendis da guaud Soglio» da la vischnanca da Bregaglia ed ha deliberà ina contribuziun chantunala da maximalmain 368 000 francs per quest intent.
Sanaziun voluminusa dal Lavuratori d'emprendissadi engiadinais a Samedan
La Regenza ha garantì a la fundaziun «Lavuratori d'emprendissadi engiadinais per scrinaris» ina contribuziun da construcziun da var 2,16 milliuns francs per renovar il lavuratori d'emprendissadi. Resalvada resta l'approvaziun dal credit tras il Cussegl grond.
Il Lavuratori d'emprendissadi engiadinais per scrinaris porscha dapi passa 50 onns plazzas d'emprendissadi per scrinarias e scrinaris ed è ina instituziun indispensabla en l'Engiadin'Ota. Divers donns vi da differentas parts dals edifizis e da l'infrastructura han incità l'instituziun purtadra da prender per mauns in project da renovaziun voluminus. En il rom dal project èsi tranter auter previs d'engrondir la surfatscha utilisabla, d'installar fanestras supplementaras vi da las fatschadas e da montar in implant fotovoltaic sin il tetg plat da la halla da laina. Ultra da quai vegn remplazzada la tschitschera e sanà il stgaudament. Il project custa tut en tut var 2,89 milliuns francs e duai vegnir terminà fin la fin da l'onn 2023.
![Foto Engadiner Lernwerkstatt](/DE/Medien/Mitteilungen/MMStaka/2022/PublishingImages/Foto%20Engadiner%20Lernwerkstatt%20Schreiner__w_1200__h_0.jpg)
© Fundaziun «Lavuratori d'emprendissadi engiadinais per scrinaris»
La Regenza ha garantì a la fundaziun «Lavuratori d'emprendissadi engiadinais per scrinaris» ina contribuziun da construcziun da var 2,16 milliuns francs per renovar il lavuratori d'emprendissadi.
Contribuziuns per centers da trenament grischuns
Ord la finanziaziun speziala (sport) ha la Regenza concedì pliras contribuziuns a centers da trenament regiunals e naziunals che han lur sedia e lur activitad principala en il chantun Grischun. Plinavant ston ils centers da trenament esser previs en il concept da juniors da la federaziun naziunala e pudair cumprovar da furnir ina contribuziun a la promoziun da juniors da Swiss Olympic. A tut en tut 36 centers da trenament garantescha la Regenza uschia contribuziuns da totalmain circa 757 100 francs.
Ord la finanziaziun speziala (sport) ha la Regenza concedì pliras contribuziuns a centers da trenament regiunals e naziunals che han lur sedia e lur activitad principala en il chantun Grischun.
Glisch verda per la nova via communala
La Regenza ha approvà la revisiun parziala da la planisaziun locala che la vischnanca da Breil aveva concludì ils 27 da settember 2020. Tras questa revisiun stgaffescha la vischnanca las premissas da la planisaziun dal territori per ina nova via communala che collia las fracziuns Breil Vitg ed Andiast sco er Vuorz e ch'è segira durant l'enviern.
La via nova duai pussibilitar d'utilisar las purschidas culturalas, politicas ed economicas e permetter ina stretga convivenza entaifer la nova vischnanca. Grazia a la via nova duain ultra da quai er las scolaras ed ils scolars pudair vegnir transportads en moda segira durant l'enviern.
© Comet Photoshopping GmbH, Dieter Enz
La Regenza ha approvà la revisiun parziala da la planisaziun locala che la vischnanca da Breil aveva concludì ils 27 da settember 2020. Tras questa revisiun stgaffescha la vischnanca las premissas da la planisaziun dal territori per ina nova via communala che collia las fracziuns Breil Vitg ed Andiast sco er Vuorz e ch'è segira durant l'enviern.