Durant ils sis onns passads è la scola populara grischuna stada sut l'ensaina da l'introducziun dal Plan d'instrucziun 21. Grazia a l'engaschament exemplaric da tut las persunas participadas è reussì quest project. A chaschun da l'occurrenza da finiziun vegn preschentà questa saira a Cuira il rapport final.

Il Plan d'instrucziun 21 Grischun è vegnì introducì ils onns 2016 fin 2021 en las scolas popularas dal chantun Grischun sut la direcziun da l'Uffizi per la scola populara ed il sport (USS) sco er cun la cooperaziun da la Scola auta da pedagogia dal Grischun (SAPGR). Il rapport accumpagnant cun il titel «Rapport final tar la realisaziun dal Plan d'instrucziun 21 Grischun» resumescha las enconuschientschas las pli impurtantas da l'andament dal project ed undrescha la collavuraziun da tut las persunas participadas.

Fit per il nov plan d'instrucziun
L'emprim chapitel principal dal rapport final dat ina survista da las furmaziuns supplementaras obligatoricas che las persunas d'instrucziun grischunas han frequentà per sa preparar per la realisaziun dal nov plan d'instrucziun. Ils onns 2017 fin 2021 ha la SAPGR purschì tut en tut bunamain 300 curs cun passa 11 000 dis da curs. Vitiers vegnan 135 furmaziuns supplementaras entaifer las scolas cun circa 6500 persunas d'instrucziun participantas. La maioritad da las persunas che han frequentà ils curs ha valità las furmaziuns supplementaras obligatoricas sco bunas fin fitg bunas.

Fitg buna realisaziun formala
In segund punct central dal rapport resumescha ils resultats da las inventarisaziuns che l'Inspecturat da scola dal USS ha fatg ils onns 2019 e 2021 en las scolas. En tut las scolas popularas è vegnida controllada la realisaziun formala dal Plan d'instrucziun 21. Tut ils purtaders da scola realiseschan cumplettamain tant las tavlas da lecziuns sco er las ulteriuras prescripziuns formalas respectivas dal Plan d'instrucziun 21 Grischun. Fitg buna è er l'infrastructura tecnica per l'instrucziun da medias ed informatica en las scolas. Per 17 803 scolaras e scolars stattan a disposiziun tut en tut 10 728 apparats. Il dumber d'apparats attribuids fixamain per stgalim da scola per 100 scolaras e scolars variescha tranter 9,4 en la scolina ed 81 sin il stgalim secundar I. Entant ch'ina gronda part da las scolas dal stgalim secundar I dispona gia d'in equipament 1:1, n'utilisescha circa in terz da las scolinas anc nagins apparats. Vegnì introducì cun success è plinavant il nov rom «individualisaziun» en la 3. classas dal stgalim secundar I. Là fixeschan las scolaras ed ils scolars prioritads persunalas en vista a lur futur professiunal u da scola e scrivan in'atgna lavur da project. Uschia tiran las scolaras ed ils scolars a niz l'ultim onn da scola en moda pli individuala e sa preparan damai cun finamiras pli cleras per la scolaziun postobligatorica.

Er vinavant instrucziun d'auta qualitad
Dapi il cumenzament da l'onn da scola 2018/19 vegnan rimnadas en l'instrucziun experientschas cun ils novs cuntegns e cun las novas cumpetenzas dal plan d'instrucziun. Cun il «giudicament e promoziun da la scola 2021–2026» metta l'Inspecturat da scola l'accent ils proxims onns sin la realisaziun dal cuntegn dal Plan d'instrucziun 21 Grischun. Tras l'evaluaziun, tras la cussegliaziun e tras l'examinaziun gida el a garantir ed a sviluppar vinavant la qualitad da tut las scolas popularas grischunas en il senn da l'egualitad da las schanzas. En il center stattan en quest connex la realisaziun da l'orientaziun a las cumpetenzas, dals novs roms «economia, lavur, tegnairchasa», «etica, religiuns, cuminanza», «individualisaziun», «orientaziun professiunala» sco er dal «plan d'instrucziun dal modul medias ed informatica».

Grond engraziament
La finiziun uffiziala da quest grond project ha lieu questa saira a Cuira. En preschientscha da represchentantas e represchentants envidads da la politica, da l'administraziun, da la scolaziun e da la furmaziun supplementara sco er da las direcziuns da las scolas e da las instituziuns vegni guardà enavos sin l'andament dal project e preschentà il rapport final. Chantal Marti-Müller, manadra da l'Uffizi per la scola populara ed il sport, engrazia en quest connex a tut las persunas participadas: «L'introducziun dal Plan d'instrucziun 21 en il chantun Grischun è stada tut en tut fitg positiva. In grond engraziament a tut quellas e quels che han gidà a cuntanscher quest term impurtant!» In engraziament tut spezial va a tut las persunas d'instrucziun che s'engaschan di per di per ina buna scolaziun dals uffants e giuvenils grischuns.

Fotografia agiuntada:

Agiunta:

Infurmaziuns:

• cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch
• dr. Chantal Marti-Müller, manadra da l'Uffizi per la scola populara ed il sport, tel. +41 81 257 27 50, e-mail Chantal.Marti@avs.gr.ch

Responsabladad: Uffizi per la scola populara ed il sport