La scola populara grischuna ha ina clera tenuta integrativa. Quai mussa l'emprim rapport chantunal davart l'evaluaziun da la scolaziun speziala integrativa. La pli gronda part da las scolaras e dals scolars instruids en moda integrativa sa senta bain ed integrada en scola. Il rapport infurmescha plinavant davart secturs che pudessan vegnir meglierads.

La scolaziun speziala integrativa sco part da la scola populara serva a promover scolaras e scolars che dovran mesiras da la pedagogia speziala pervia d'in impediment. Tenor pussaivladad vegn la promoziun fatga en moda integrativa, quai vul dir: las scolaras ed ils scolars frequentan l'instrucziun a la scola regulara da lur lieu da domicil. Per incumbensa dal Departament d'educaziun, cultura e protecziun da l'ambient ha l'Inspecturat da scola da l'Uffizi per la scola populara ed il sport evaluà – en collavuraziun cun la Scola auta interchantunala da pedagogia curativa da Turitg – la scolaziun speziala integrativa en il chantun Grischun. Sin fundament dal rapport d'evaluaziun vegnan examinadas mesiras per sviluppar la qualitad da la scolaziun speziala integrativa.

Evaluaziun cumplessiva
Il rapport «Evaluaziun scola speziala integrativa dal Grischun 2021/22» dat per l'emprima giada ina vasta survista davart la realisaziun da la scolaziun speziala integrativa en il chantun. Per quest intent èn vegnidas integradas tut las persunas participadas da quest sectur: scolaras e scolars, persunas responsablas per l'educaziun, persunas d'instrucziun da classa, pedagogas e pedagogs curativs da scola, terapeutas e terapeuts, assistenzas da scola, tut las direcziuns da las scolas regularas, tut las direcziuns da las instituziuns da la scolaziun speziala sco er las manadras ed ils manaders da sectur e las persunas responsablas per la scolaziun speziala integrativa. Tut en tut èn sa participadas passa 700 persunas a l'enquista en scrit.

Invista da tschintg secturs
Ils resultats da l'evaluaziun sa basan sin l'analisa dals documents, sin in'enquista preliminara da tut las persunas involvidas sco er sin discurs cun persunas spezialisadas. Supplementarmain èn vegnidas examinadas en total 59 situaziuns da promoziun en tut las regiuns linguisticas ed en tut ils ciclus sco er per tut ils geners d'impediment. La visita al lieu ha mintgamai durà in mez di ed ha cumpiglià l'observaziun da l'instrucziun e da la promoziun sco er intervistas. En l'evaluaziun èn vegnids dilucidads tschintg secturs: «Tenuta, tractament ed integraziun sociala», «setting da promoziun e realisaziun», «procedura e process da la planisaziun da la promoziun», «collavuraziun e communicaziun» e «direcziun e garanzia da qualitad».

Promoziun commensurada
L'evaluaziun precisescha la ferma francaziun da la scolaziun speziala integrativa en la scola populara grischuna. En quest rom survegnan las scolaras ed ils scolars ina promoziun commensurada. En reguard organisatoric èn l'instrucziun, il sustegn supplementar e la terapia accordads bain ina cun l'auter. L'instrucziun n'è betg orientada dapertut tuttina bain al basegn da promoziun. Ina sfida speziala è la realisaziun da la scolaziun speziala integrativa en cas d'in impediment da lingua.

Buna collavuraziun
Las persunas d'instrucziun ed en spezial las persunas responsablas per l'educaziun èn fitg cuntentas cun ils discurs cuminaivels e cun la planisaziun da la promoziun. Las persunas responsablas per l'educaziun han er l'impressiun d'esser infurmadas bain. Ils singuls plans da promoziun èn da differenta qualitad professiunala e per part memia pauc utilisabels per l'instrucziun. La collavuraziun da las persunas d'instrucziun participadas è per gronda part garantida bain. Las cumpetenzas, las rollas e las incumbensas èn scleridas per gronda part.

Organisaziun pretensiusa
La direcziun organisatorica, persunala e spezialisada da la scolaziun speziala integrativa vegn responsada da las instituziuns da la scolaziun speziala. La cussegliaziun e la furmaziun supplementara vegnan appreziadas quasi dal tuttafatg da la gronda part da las persunas d'instrucziun. Perquai che la responsabladad persunala ed organisatorica è chaussa da las scolas spezialas, èsi pli difficil da planisar e da realisar la scolaziun speziala en las scolas regularas.

Fotografia agiuntada:

Agiuntas:

• Rapport «Evaluaziun scola speziala integrativa dal Grischun 2021/22»
• Agiunta tar il rapport – Resultats da l'enquista

Infurmaziuns:

Responsabladad: Uffizi per la scola populara ed il sport