La Regenza ha revedì l'Ordinaziun davart la promoziun dal sport e dal moviment (Ordinaziun da promoziun dal sport, OSpo). Cun promover la coordinaziun locala e regiunala dal sport vuless ella gidar las vischnancas a colliar in cun l'auter las acturas ed ils acturs participads sco er a meglierar las cundiziuns generalas per il sport e per il moviment sin plaun local.

Pervia da l'augment andetg da la transfurmaziun digitala e da la lavur mobila durant ils ultims 2 onns, è in spazi da viver interessant daventà anc pli impurtant per l'attractivitad da l'economia locala. Purschidas da temp liber attractivas èn in factur economic essenzial en quest connex. Grazia ad ina collavuraziun coordinada da las acturas e dals acturs locals en la promoziun dal sport duain vegnir sviluppadas purschidas da moviment e da sport cumplementaras per tut la populaziun e rinforzadas las lavurs che las uniuns prestan en uffizi d'onur.

Posiziunament sco lieu da lavur, da viver e da recreaziun attractiv
La coordinaziun dal sport en las vischnancas è in punct central da svilup en il program da la Regenza 2021–2024. Il Grischun sco chantun da muntogna duai vegnir posiziunà sco lieu da lavur, da viver e da recreaziun attractiv. Sco mesira chantunala correspundenta ha la Regenza previs – ultra da sensibilisar las vischnancas per la coordinaziun dal sport sco er ultra da las metter a disposiziun plattafurmas per sa colliar e per barattar experientschas – da porscher in sustegn finanzial per stgaffir posts per la coordinaziun dal sport, e quai en furma d'ina finanziaziun da partenza ch'è limitada areguard il temp. Cun la revisiun parziala da l'Ordinaziun chantunala davart la promoziun dal sport e dal moviment ha la Regenza creà las premissas necessarias per quai.

Sensibilisaziun e colliaziun cun agid da posts per la coordinaziun dal sport
Grazia a las raits localas e regiunalas da moviment e da sport duain dapli abitantas ed abitants pudair sa mover e far sport tenor lur basegns. Uschia na vegn betg mo promovida l'attractivitad dal lieu, mabain vegn er prestada ina contribuziun a la sanadad fisica, psichica e sociala da la populaziun. Il medem mument po er il turissem profitar da quai. Las vischnancas e las regiuns interessadas duain vegnir cussegliadas da l'Uffizi per la scola populara ed il sport e sustegnidas cun contribuziuns pauschalas per stgaffir u per sviluppar vinavant ina rait locala da moviment e da sport. En il center stat qua la rolla d'ina coordinatura respectivamain d'in coordinatur da sport. Questa persuna procura per la coordinaziun da l'entira rait da sport, è la persuna da contact en la vischnanca e gida a realisar ina planisaziun dal territori ed ina infrastructura che promova il moviment. Plinavant po ella surpigliar ulteriuras incumbensas communicativas ed administrativas. Grazia a la revisiun parziala da l'Ordinaziun chantunala davart la promoziun dal sport e dal moviment pon las vischnancas vegnir sustegnidas da qua envi cun ina finanziaziun da partenza durant maximalmain 4 onns per stgaffir u per sviluppar vinavant ina rait locala da moviment e da sport. Il chantun surpiglia maximalmain la mesadad da la summa dal salari annual d'ina coordinatura locala u d'in coordinatur local da sport.

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 15.00 fin las 16.00), e‑mail Jondomenic.Parolini@ekud.gr.ch

Responsabladad: Regenza