Ils 8 da favrer 2022 ed ils 8 da mars 2022 han gì lieu ils examens d'admissiun chantunals per entrar en ina scola media grischuna. 524 scolaras e scolars han dumagnà l'admissiun en ina da las nov scolas medias grischunas cun las partiziuns gimnasi, scola media commerziala e scola media spezialisada.
Tut en tut han 838 scolaras e scolars frequentà ils examens d'admissiun chantunals en ina da las nov scolas medias grischunas. L'onn precedent eran quai 779 candidatas e candidats.
Examen d'admissiun per l'emprima classa dal gimnasi da lunga durada
Da las 379 scolaras e scolars da la 6. classa primara ch'èn sa preschentads per l'examen d'admissiun han 221 (58,3 pertschient) reussì l'admissiun en la 1. classa dal gimnasi da 6 onns (uschenumnà gimnasi da lunga durada). Areguard il total da scolaras e scolars da la 6. classa primara (1678) importa la quota da giuvenils admess a la 1. classa dal gimnasi da lunga durada 13,2 pertschient. La quota d'admissiun da l'onn precedent era cun 12,9 pertschient in zic pli bassa.es war mit 12,9 Prozent etwas tiefer.
Examen unifitgà per la 3. classa gimnasiala sco er per la 1. classa da la scola media commerziala u spezialisada
Da las 459 scolaras e scolars che han fatg quest onn l'examen unifitgà per l'admissiun en la 3. classa gimnasiala u en la 1. classa da la scola media commerziala u da la scola media spezialisada, han 185 (40,3 pertschient) dumagnà l'admissiun en la 3. classa gimnasiala e 118 (25,7 pertschient) l'admissiun en la 1. classa da la scola media commerziala u da la scola media spezialisada. La quota d'admissiun per entrar en la 3. classa gimnasiala importa quest onn var 11 pertschient cumpareglià cun l'annada da referenza ed è uschia en il rom da l'onn precedent.
Success tar ils examens finals a las scolas medias dal Grischun
Tut en tut 555 scolaras e scolars han absolvì en ina da las nov scolas medias grischunas ils examens finals (387 maturitad gimnasiala, 78 diplom da scola media spezialisada, 61 maturitad spezialisada e 29 certificat da scola media commerziala). 539 han gì success ed han pudì prender en consegna ils ultims dis lur attestat final.
Infurmaziuns:
Regina Just Brodbeck, manadra da la partiziun Scolas medias, Uffizi per la furmaziun media-superiura, tel. +41 81 257 61 69, e-mail Regina.Just@ahb.gr.ch
Responsabladad: Uffizi per la furmaziun media-superiura