Infurmaziuns fundadas davart il stadi da la rait da vias èn ina basa impurtanta per planisar il mantegniment e la renovaziun. L'Uffizi da construcziun bassa rimna las datas necessarias cun agid d'in vehichel da mesiraziun spezial. Durant las proximas duas emnas è quest vehichel en gir sin las vias chantunalas da l'Engiadina e dal Landwassertal sco er sin las vias dals pass dal Flüela, da l'Alvra, dal Fuorn, dal Bernina e dal Malögia. La cuvrida da la via vegn uschia registrada detagliadamain e traidimensiunalmain cun cameras spezialas sco er cun indrizs da mesiraziun.

A partir dals 18 da fanadur 2022 charrescha in vehichel da mesiraziun durant duas emnas tras il chantun. Cun cameras spezialas e cun indrizs da mesiraziun – tranter auter in scanner da laser – registrescha el il stadi da la cuvrida da la via e generescha uschia maletgs 3D. Il medem vehichel è stà en funcziun sin las vias grischunas gia pli baud. Quest onn vegnan registrads var 450 kilometers vias chantunalas en l'Engiadina ed en il Landwassertal sco er sin ils pass dal Flüela, da l'Alvra, dal Fuorn, dal Bernina e dal Malögia. Silsuenter vegnan ils maletgs e las datas elavurads uschia, ch'els pon vegnir duvrads da l'Uffizi da construcziun bassa sco er d'auters posts da servetsch chantunals. L'elavuraziun cumpiglia tranter auter l'anonimisaziun dals numers dals autos e da las persunas sin ils maletgs sco er l'inserziun en la rait da coordinatas naziunalas. Uschia po mintga maletg vegnir localisà cun in'exactadad da 2 centimeters.

In aut tempo permetta mesiraziuns senza impediments dal traffic
Infurmaziuns fundadas davart il stadi da la rait da vias èn ina basa impurtanta per planisar il mantegniment e la renovaziun. Dapi il 2011 vegn perquai l'entira rait da vias chantunalas inspectada mintgamai durant 3 onns cun agid d'in vehichel spezial. Mintga onn vegnan registrads circa 400 fin 450 dals totalmain 1360 kilometers vias chantunalas. Las datas eruidas permettan da giuditgar visualmain ils donns sco er da mesirar quant planivs ch'ils vials èn. Plinavant pon ins localisar tumbins anc betg registrads ed integrar tals en las chartas digitalas. A maun da questas mesiraziuns vegnan actualisads pli tard ils catasters da conducts.

Las registraziuns cun il vehichel da mesiraziun duran circa tschintg dis. Ils viadis èn pussaivels mo, sche las vias èn sitgas e sch'igl è cler. Grazia a l'equipament correspundent e grazia a l'experientscha dal persunal po il vehichel far ils maletgs e las mesiraziuns cun ina sveltezza da 50 fin 80 kilometers per ura. Sin ils trajects pertutgads na datti perquai nagins impediments dal traffic.

Fotografias agiuntadas:

Maletg 2: Vehichel da mesiraziun da davos
Maletg 3: Vehichel da mesiraziun da davant

Infurmaziuns:

• Steven Riedi, planisaziun dal mantegniment, Uffizi da construcziun bassa, tel. +41 81 257 37 34, e‑mail Steven.Riedi@tba.gr.ch
  
• Reto Knuchel, inschigner chantunal, Uffizi da construcziun bassa, tel. +41 81 257 35 01, e‑mail Reto.Knuchel@tba.gr.ch
  

Responsabladad: Uffizi da construcziun bassa