La notg dals 31 da fanadur sin il 1. d'avust 2022 ha la surveglianza chantunala da chatscha sajettà dus lufs dal triep dal Beverin. Ils animals ch'èn vegnids sajettads èn lufs mastgels giuvens.

Sin dumonda dal chantun Grischun aveva l'Uffizi federal d'ambient (UFAM) dà ils 14 da fanadur 2022 la permissiun da sajettar dus lufs giuvens dal triep dal Beverin, quai suenter ch'il triep aveva stgarpà en ses territori da chatscha entaifer paucs dis duas vatgas-mamma creschidas sin duas alps vischinas ed avant quai er in grond dumber da nursas. La surveglianza da chatscha ha pudì sajettar ils dus lufs giuvens la notg sin il 1. d'avust sin la Stutzalp en la proxima vischinanza d'ina muntanera da nursas. Per las analisas patologicas vegnan ils dus lufs sajettads tramess ussa al Center per medischina da peschs e selvaschina (FIWI) a Berna. L'analisa genetica vegn fatga dal Laboratori da biologia da conservaziun da l'Universitad da Losanna. La surveglianza da chatscha surveglia vinavant intensivamain il territori da chatscha dal triep, en spezial per survegnir ulteriuras enconuschientschas davart sia reproducziun actuala.

Ulteriurs lufs ston vegnir sajettads
Dapi plirs onns mussa il triep dal Beverin in svilup che chaschuna adina dapli conflicts. Ord vista professiunala èsi da spetgar, che quest svilup na po betg vegnir impedì mo cun sajettar lufs giuvens. La finamira dal chantun resta perquai quella d'allontanar – en il rom dal dretg svizzer – l'entir triep dal Beverin e da sajettar il luf-bab M92 che ha in cumportament spezialmain problematic.

Infurmaziuns:

Arno Puorger, collavuratur academic Animals da rapina gronds, Uffizi da chatscha e pestga, tel. +41 81 257 87 67 (cuntanschibel da las 8.00 fin las 10.00), e-mail Arno.Puorger@ajf.gr.ch

Responsabladad: Uffizi da chatscha e pestga