La Regenza ha approvà il project da la via da guaud «Uaul dallas Vallettas – Rost» da la vischnanca da Trun ed ha deliberà ina contribuziun chantunala da maximalmain 1,44 milliuns francs per quest intent. Ils custs totals importan var 1,98 milliuns francs. Il territori dal project da la vart dretga da la val dal Rain Anteriur cumpiglia ina surfatscha da guaud da 99 hectaras. Da quellas èn 75 hectaras determinadas sco guaud da protecziun dal tip A. Davent da l'Uaul dallas Vallettas fin a l'Alp Nadels èn quests guauds da protecziun accessibels mo insuffizientamain per la selvicultura ed il standard da construcziun da la via da guaud na satisfa betg a las pretensiuns actualas a la segirezza dal traffic. La tgira dals guauds da protecziun chaschuna oz fitg gronds custs ed è ineffizienta. La laina racoltada vegn l'emprim transportada cun tractor e char annex u cun l'helicopter e lura transchargiada sin camiuns. Tras quai daventan la racolta da laina ed ils custs da transport considerablamain pli chars.

Quest project cuntegna l'amplificaziun da la via da guaud existenta sin ina lunghezza da circa 1,5 kilometers ad ina via da guaud charrabla cun camiuns cun ina ladezza da 3 meters. Per schlargiar la via ed en spezial er las quatter plattas da volver dovri per part mirs da crappa da bloc ed uschenumnadas paraids enchastradas d'atschal. Per pudair cultivar meglier il guaud da protecziun vegnan ultra da quai construidas duas plazzas per l'installaziun d'ina crana a cabel resp. per deponer laina. Plinavant vegn er meglierada la deviaziun da l'aua.

La Regenza ha approvà il project da la via da guaud «Access al guaud Val Stussavgia, via da Calörtsch» da la vischnanca da Val Stussavgia ed ha deliberà ina contribuziun chantunala da maximalmain 2,36 milliuns francs per quest intent. Ils custs subvenziunabels importan var 3,4 milliuns francs. Il territori dal project da la vart sanestra da la Val Stussavgia cumpiglia ina surfatscha da guaud da 73 hectaras. En il territori sa chattan guauds da protecziun ed ulteriurs guauds, surfatschas utilisadas da l'agricultura sco er l'abitadi Calörtsch e differentas aclas. Il standard da construcziun da la via da guaud na correspunda betg pli a las pretensiuns actualas. Ina cultivaziun dal guaud effizienta cun ils meds d'ozendi n'è betg pli pussaivla e la segirezza per ils transports da laina e per ils ulteriurs utilisaders da la via n'è betg pli garantida.

En il rom dal project qua avant maun duai tranter auter vegnir schlargià il vial a 3,3 meters. Ultra da quai vegnan creads novs lieus da guntgida e plazzas per deponer laina, la structura da la via vegn rinforzada, ils mirs da crappa natirala existents vegnan sanads e la deviaziun da l'aua vegn renovada cun conducts d'aua da sfundrada.

La Regenza ha approvà l'annullaziun dal project per demontar la veglia punt artgada da crap «Casott» sin il Pass dal San Bernardin. Ella excluda quest traject da via da la rait da vias chantunalas e surlascha il Ponte Casott a la vischnanca da Valragn.

Il project d'exposiziun oriund dal matg 2020 preveseva da demontar l'artg da crap, quai pervia dal privel ch'el dettia ensemen. La via veglia sur il San Bernardin è però registrada en l'Inventari federal da las vias da communicaziun istoricas sco object d'impurtanza naziunala. La punt «Casott» è ina part integrala da quest traject che vegn classifitgà sco «trassé istoric cun substanza». Per quest motiv e pervia da la posiziun da la Tgira da monuments dal Grischun sco er pervia da divers recurs è l'Uffizi da construcziun bassa vegnì a la conclusiun da desister da quest project e tenor la cunvegna cun la vischnanca da Valragn da mantegnair resp. da restaurar la punt. La vischnanca è sa mussada pronta da surpigliar la punt. Per pudair garantir il mantegniment da l'artg da crap vegn la platta veglia dal vial isolada sur l'entira surfatscha cun ina matta da betonit e cuvrida cun material da planar. Medemamain vegn construida ina saiv da lain sco protecziun cunter crudadas.

Cun intginas cundiziuns e permissiuns ha la Regenza approvà il project da la vischnanca da San Murezzan per construir rempars per l'En e per il Lai da San Murezzan.

En il territori da la sbuccada da l'En en il Lai da San Murezzan è resultada sur onns ina sedimentaziun da crappa che ha furmà in delta en il lai. En cas d'aua gronda stagnan questas sedimentaziuns la deflussiun en l'En. La segirezza dal territori abità da San Murezzan Bogn è pia periclitada en cas d'aua gronda. Plinavant vegn restrenschida la funcziun dal conduct da sfradentar da la patinera Ludains. Per eliminar quests deficits duain vegnir realisadas mesiras da mantegniment da las correcziuns dals curs d'aua. Cun agid d'in tschitschaterra duai material da sediment vegnir dustà e deponì da nov en l'aua profunda cunfinanta, en il territori ch'è protegì da la deflussiun dal delta. Tut en tut duai uschia in volumen da material da var 5000 meters cubic vegnir deponì en in auter lieu. Quest project da construcziun vegn finanzià unicamain da la vischnanca da San Murezzan.

La Regenza ha concedì a la Baselgia evangelic-refurmada da Domat ina contribuziun chantunala da var 115 000 francs per la sanaziun totala da la baselgia evangelica al pe ost da la Tuma Platta. Il project cumpiglia lavurs da tetgaglia, la renovaziun da las installaziuns electricas e sanitaras, la tecnica dal clutger, ils indrizs da cuschina, lavurs da stuccatura e da pictur, cuvridas da palantschieus e da paraids sco er ils conturns. Tut en tut èn vegnids calculads custs dad 1,8 milliuns francs per il project.

Cun la fundaziun da l'actuala Ems-Chemie l'onn 1936 (quella giada Holzverzuckerungs SA) èn las emprimas persunas protestantas vegnidas ad abitar en il vitg catolic da Domat. Ina giada per emna las vegniva purschì en la fabrica in'ura biblica. Per visitar il cult divin stuevan ellas dentant ir en il vitg vischin, Favugn. L'onn 1955 è la finala vegnida fundada la plaiv evangelica ed il november 1964 è vegnida inaugurada la baselgia evangelica da Domat.