La Regenza ha dà en consultaziun il sboz per ina revisiun parziala da la Lescha davart l'assicuranza da malsauns e la reducziun da las premias. La revisiun parziala realisescha la midada da la Lescha federala davart l'assicuranza da malsauns dals 19 da zercladur 2020 sin plaun chantunal.

Cun questa revisiun parziala vegnan realisadas las midadas da la Lescha federala davart l'assicuranza da malsauns dals 19 da zercladur 2020.

Cun la revisiun parziala qua avant maun da la Lescha davart l'assicuranza da malsauns e la reducziun da las premias duain vegnir attribuidas las incumbensas respectivas a l'Uffizi da sanadad. Concret duai el da qua davent esser cumpetent per l'admissiun dals furniturs da prestaziuns a l'activitad ambulanta a quint da l'assicuranza obligatorica da malsauns (AOMal) sco er per la surveglianza dals furniturs da prestaziuns admess. Ultra da quai duai en l'avegnir la Regenza esser cumpetenta per limitar il dumber da medias e medis ch'èn activs en il sectur ambulant. Ils princips per fixar ils dumbers maximals da medias e medis activs en il sectur ambulant, vegnan medemamain reglads en la lescha.

Ils documents da consultaziun èn ussa disponibels
La consultaziun dura dals 15 d'avust 2022 fin ils 13 da november 2022. Ils documents appartegnents pon vegnir consultads sin la pagina d'internet dal chantun Grischun. Ultra da quai pon els vegnir empustads tar il Departament da giustia, segirezza e sanadad (tel. +41 81 257 25 16).

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch (cuntanschibel da las 13.30 fin las 14.30)

Responsabladad: Regenza