La Cumissiun per giustia e segirezza dal Cussegl grond (CGS) ha rinforzà las Dretgiras regiunalas Alvra e Malögia cun dapli persunal, per ch'il dumber dals cas pendents possia vegnir reducì.

La Cumissiun per giustia e segirezza dal Cussegl grond è l'autoritad da surveglianza da la Dretgira chantunala e da la Dretgira administrativa sco er l'autoritad da surveglianza suprema da las dretgiras regiunalas. En questa funcziun ha ella adina puspè exprimì, ch'ina da sias finamiras impurtantas saja ina giurisdicziun qualitativamain buna, ma er effizienta. Las persunas che tschertgan dretg en il Grischun duain survegnir svelt ina decisiun giudiziala. Per quai dovri resursas persunalas adattadas en las dretgiras, en spezial er derschadras e derschaders.

Ils ultims onns han numerusas decisiuns politicas, ma er svilups da la societad procurà per in augment da la chargia da lavur en las dretgiras. En la sessiun da favrer 2021 ha il Cussegl grond perquai concludì ina revisiun parziala da la Lescha davart l'organisaziun giudiziala ed uschia stgaffì la pussaivladad da rinforzar las dretgiras chantunalas cun dapli persunal, sche derschadras u derschaders èn impedids per pli ditg d'exequir lur uffizi u sche las dretgiras n'èn betg pli en cas – pervia d'ina chargia da lavur extraordinaria – da liquidar dispitas giuridicas entaifer in termin adequat. Perquai ha la CGS rinforzà gia l'onn passà la Dretgira chantunala dal Grischun e la Dretgira regiunala Plessur cun derschadras e derschaders extraordinaris. Ellas ed els sustegnan las derschadras ed ils derschaders elegids per ina durada limitada da 2 onns en lur lavur.

Alvra e Malögia dovran sustegn per reducir il dumber dals cas pendents
Er tar las Dretgiras regiunalas Alvra e Malögia èn la chargia da lavur ed uschia il dumber dals cas pendents creschids ils ultims onns. En il fratemp na pon las dispitas giuridicas betg pli vegnir liquidadas entaifer in temp adequat. Perquai han las duas dretgiras dumandà da las rinforzar cun derschadras u derschaders extraordinaris, mintgamai en la dimensiun da 100 pertschients da plazzas, per la durada da 2 onns. La CGS ha examinà ed approvà las dumondas. Cun l'elecziun da duas derschadras extraordinarias ed in derschader extraordinari han ins pudì occupar en il fratemp las plazzas approvadas.

Per la Dretgira regiunala Alvra èn vegnidas elegidas Barbara Steinbacher e Ladina Sturzenegger mintgamai per ina plazza da 50 pertschient, per la Dretgira regiunala Malögia Peter Guyan per in pensum da 100 pertschient. Dal rinforzament persunal spetga la cumissiun, che las duas dretgiras possian reducir il dumber dals cas pendents ad ina dimensiun usitada e che las persunas che tschertgan dretg survegnian proceduras sveltas.

Infurmaziuns:

Responsabladad: Cussegl grond / Cumissiun per giustia e segirezza