Suenter che l'extensiun da la purschida dal traffic public planisada per l'urari 2022 è vegnida spustada pervia da la pandemia, vegn quella ussa per fortuna realisada per gronda part il december 2022 per l'urari 2023. Il chantun fa cun quai in impurtant pass per realisar l'actual Program da la Regenza 2021–2024 en il sectur dal traffic public e sustegna pia a medem temp en moda decisiva ina furma da mobilitad che schanegia il clima, en il senn dal «Plan d'acziun Green Deal».

En il rom dal nov urari extenda il chantun cun cleras finamiras la purschida dal traffic public en il Grischun. Il medem mument po el er profitar d'ina meglra purschida d'urari da las Viafiers federalas svizras (VFF) per e davent da Cuira resp. Landquart. Tenor il Program da la Regenza 2021–2024 duai la populaziun pia vegnir motivada da midar pli savens al traffic public sco furma da mobilitad che schanegia il clima. La purschida d'urari meglierada duai plinavant augmentar l'attractivitad dal Grischun sco chantun d'abitar, da lavurar e da turissem.

Vasta cooperaziun en la procedura d'urari
La primavaira 2022 èn vegnidas publitgadas diversas extensiuns da la purschida en in sboz provisoric da l'urari. En il rom d'ina consultaziun han la populaziun grischuna sco er differentas organisaziuns pudì prender posiziun en chaussa. Passa 100 reacziuns èn entradas en il rom da questa procedura da participaziun. Per il nov urari han quellas per part purtà meglieraziuns substanzialas da la purschida planisada. L'urari cun la purschida extendida planisada duai vegnir realisà a partir dal december 2022 tras las interpresas da transport ch'èn activas en il chantun.

Tact da mes'ura per il InterCity Turitg – Cuira las fins d'emna
Gia il matg 2022 han las Viafiers federalas communitgà, ch'i possia vegnir introducì las fins d'emna ed ils firads il tact da mes'ura per il InterCity tranter Turitg e Cuira a partir dal december 2022. Ultra da quai vegnan – medemamain las fin d'emnas ed ils firads – mintgamai dus pèrs da tren dad InterCity colliads directamain cun Berna – Losanna – Genevra. Uschia pon passagieras e passagiers da la Svizra franzosa viagiar en il Grischun senza midar tren. Pervia da la gronda dumonda en il traffic da temp liber vegn er extendida la purschida da colliaziuns directas dad ICE per e davent da la Germania las fins d'emna. Questa purschida vegn dublegiada da fin ussa duas a da nov quatter colliaziuns. Da nov datti uschia ina colliaziun directa tranter Kiel a la Mar da l'Ost e Cuira resp. tranter Cuira e Berlin.

Novas colliaziuns da tren e novs concepts da bus per las regiuns e vischnancas
En il rom dal concept da purschida Retica30 è vegnì empustà in nov RegioExpress da Cuira a Tusaun tar la Viafier retica (VR). La purschida sin quest traject vegn uschia dublegiada al tact da mes'ura e las passagieras ed ils passagiers survegnan dapli colliaziuns pli sveltas. Sin fundament da quest nov RegioExpress survegn la regiun Alvra ultra da quai ina nova e meglra purschida da bus. En la Val dal Rain Grischuna vegn la purschida dal traffic public per part structurada da nov. La dumonda da mobilitad vegn uschia transferida dals bus sin la viafier ch'è pli ecologica. Cun il nov concept da bus daventan plinavant pli sveltas las colliaziuns en la regiun turistica Flem/Laax, ed en l'intschess da l'aglomeraziun da la Val dal Rain Grischuna pon ils tacts vegnir concentrads. Uschia per exempel tranter la citad da Cuira e las vischnancas da Trimmis resp. da Domat. Questas mesiras duain motivar la populaziun da midar pli savens dal traffic individual motorisà al traffic public.

Bus electrics en la Val dal Rain Grischuna
La primavaira 2023 vegnan remplazzads indesch bus da diesel tras novs bus electrics, quai en la Val dal Rain Grischuna tranter la vischnanca da Bogn Ragaz e la citad da Cuira. I vegn damai sa referì al test cun in bus electric a Cuira ed en l'Engiadina, ch'è stà in success. Ils proxims onns èsi previs da metter en funcziun bus electrics er en ulteriuras regiuns.

Infurmaziuns:

• Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
• Thomas Schmid, manader da l'Uffizi d'energia e da traffic, tel. +41 81 257 36 21, e-mail Thomas.Schmid@aev.gr.ch

Responsabladad: Departament d'infrastructura, energia e mobilitad