Il basegn da cussegliaziun da babs s'augmenta. En il rom d'in project da pilot da 2 onns stattan a disposiziun en l'avegnir cussegliaziuns d'in cussegliader da babs en las instituziuns regiunalas da la cussegliaziun da geniturs.

L'engaschament da tgira patern ha effects positivs sin il svilup cognitiv, emoziunal e social da poppins e d'uffants. La rolla sco bab, la relaziun cun l'uffant, midadas en la relaziun da partenadi sco er la cumpatibilitad da la professiun cun la famiglia èn temas pussaivels che pon occupar ils babs. Per sustegnair e per rinforzar ils babs en lur rolla ha l'Uffizi da sanadad lantschà in project da pilot da 2 onns per cussegliar ils babs. La finamira dal project da pilot è da chattar ora, sche cussegliaziuns vegnan giavischadas explicitamain per babs en il chantun. Il project sa drizza a babs d'uffants en la vegliadetgna prescolara.

Purschida da cussegliaziun chantunala per babs a partir dal settember
L'Uffizi da sanadad ha concedì la direcziun dal project per rinforzar las resursas da babs a Nicolas Zogg. El è supervisur e coach orientà al process ed ha in diplom en lavur d'umens e babs da l'Institut svizzer per dumondas d'umens e da babs. Sco cussegliader da babs stat el a disposiziun a partir dal settember cumplementarmain a las structuras da la cussegliaziun da geniturs. Ses champ d'incumbensas cumpiglia la cussegliaziun gratuita e confidenziala da babs en il rom dal project da pilot.

Infurmaziuns:

Denise Rudin, manadra da la partiziun Promoziun da la sanadad e prevenziun, Uffizi da sanadad, tel. +41 81 257 64 02, e‑mail Denise.Rudin@san.gr.ch

Responsabladad: Uffizi da sanadad