Il bindel è taglià: Suenter ina fasa da construcziun dad 1 onn e mez po il Center chantunal per l'emprima registraziun da requirentas e requirents d'asil en il Meiersboden vegnir avert uffizialmain e surdà a l'Uffizi da migraziun e da dretg civil ch'è cumpetent per il manaschi. Vegnì construì è in edifizi simpel e funcziunal cun elements da lain prefabritgads. Il chantun po uschia ademplir en moda optimala ed effizienta las incumbensas che la Confederaziun al ha surdà.

Cun l'edifizi nov en il Meiersboden sin il territori communal da Churwalden ha l'Uffizi da migraziun e da dretg civil a disposiziun in center per l'emprima registraziun cun 180 plazzas da collocaziun, ch'è funcziunal e che correspunda als basegns. Malgrà il standard da construcziun simpel e robust èsi gartegià d'attribuir als locals interns in caracter agreabel e confortabel che correspunda als basegns da las requirentas e dals requirents d'asil. A disposiziun stattan chombras da dus, da quatter e da sis letgs e las requirentas ed ils requirents d'asil dividan ils locals d'inscunter e da mangiar sco er ils locals sanitars e la lavandaria. Sco cumplettaziun porscha il Center per l'emprima registraziun localitads da scolaziun per il program d'instrucziun linguistica, ina cuschina per scolaziuns sco er ina stanza da project. Grazia a las structuras necessarias per las emprimas registraziuns, l'assistenza e l'integraziun pussibilitescha l'edifizi in manaschi effizient a las collavuraturas ed als collavuraturs.

Edifizi nov e funcziunal
La clera structura da l'edifizi sco er la construcziun cun elements da lain prefabritgads garanteschan a lunga vista ina gronda flexibilitad areguard la midada d'utilisaziun ed areguard la reutilisabladad. L'edifizi ha uschia valurs che surpassan l'intent ed il basegn actual. El è vegnì realisà en il standard Minergie-Eco che garantescha in pitschen consum d'energia ed in'auta cumpatibilitad ecologica. Stgaudà vegn l'edifizi cun il stgaudament da pellets da lain existent en l'edifizi vischin dal stabiliment da protecziun civila. Ils custs totals per l'edifizi nov importan 7,7 milliuns francs. Ultra da quai èn resultads custs da 0,89 milliuns francs per sanar ordavant il sulom.

Strategia da collocaziun chantunala en il sectur d'asil
Cun sias structuras d'asil sto il chantun restar flexibel ed abel da reagir sin fluctuaziuns. Ed el sto pudair reagir sin differents scenaris da svilup, tranter occupaziuns bassas ed occupaziun cumplaina. Stabiliments da collocaziun che appartegnan al chantun portan dapli segirezza da planisaziun ed ina pli pitschna dependenza dal martgà da locaziun. Cun stabiliments affittads vegnan egualisadas las fluctuaziuns. En il rom da la strategia chantunala da collocaziun e d'assistenza vegn – cun il nov Center per l'emprima registraziun – cuntanschida ina relaziun equilibrada tranter atgnas plazzas da collocaziun e plazzas da collocaziun affittadas.

Di da las portas avertas
Fin mez settember 2022 fa l'Uffizi da migraziun e da dretg civil anc las ultimas lavurs preparatoricas. Alura vegnan las emprimas requirentas ed ils emprims requirents d'asil a sa chasar en il nov alloschi. Uschespert ch'il mintgadi en il Center per l'emprima registraziun funcziuna bain, vegn la populaziun interessada envidada ad in di da las portas avertas.

Fotografias agiuntadas:

Foto 2, Foto 3, Foto 4, Foto 5, Foto 6

©Yanik Bürkli

Infurmaziuns:

• Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
• Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
• Markus Dünner, architect chantunal, Uffizi da construcziun auta, tel. +41 81 257 36 31, e-mail Markus.Duenner@hba.gr.ch

Responsabladad: Regenza