Ils 31 da december 2021 dumbrava il chantun Grischun 201 376 abitantas ed abitants permanents, 1280 persunas dapli ch'il cumenzament da l'onn. En il chantun èn vegnids registrads levamain dapli mortoris ch'ils onns precedents.
L'onn 2021 è l'augment da la populaziun en il Grischun stà cun 0,64 pertschient sut la media naziunala (0,79 pertschient). Durant l'onn da rapport han ils chantuns Vallais, Vad, Friburg ed Argovia registrà las ratas da creschientscha las pli grondas. Da l'autra vart ha il chantun Basilea-Citad registrà ina leva diminuziun da la populaziun permanenta durant la medema perioda. En grondas parts da la Svizra è il saldo da migraziun internaziunal puspè stà il motiv principal per l'augment da la populaziun durant l'onn 2021. Durant l'onn da rapport èn immigradas en Svizra tut en tut 48 871 persunas dapli che quai ch'i èn emigradas.
Differentas tendenzas da regiun a regiun
L'onn 2021 è la populaziun s'augmentada il pli fitg en las regiuns grischunas Landquart, Moesa e Plessur. L'augment è sa concentrà oravant tut sin las axas principalas da la Val dal Rain Grischuna e da la Mesolcina sco er sin ils territoris cunfinants da quellas. En las regiuns Alvra e Malögia sco er Partenz/Tavau è la populaziun permanenta sa diminuida durant l'onn passà. Exprimì en cifras absolutas han las regiuns Plessur (plus 411 persunas) e Landquart (plus 402 persunas) registrà l'augment da la populaziun il pli grond.
Populaziun permanenta da las regiuns grischunas: midadas procentualas da l'onn 2021 e dumber da la populaziun per ils 31 da december 2021
In sguard sin las 15 vischnancas cun pli che 3000 abitantas ed abitants mussa che Tusaun, Landquart e Maiavilla èn creschids procentualmain il pli fitg durant l'onn passà. Entaifer questa gruppa da las vischnancas grischunas las pli grondas han Arosa, Tavau e Claustra nudà ina diminuziun da la populaziun.
Dapli mortoris – tuttina bleras naschientschas
En il Grischun è il surpli da naschientschas stà negativ er l'onn passà. Cun in dumber da naschientschas sumegliant èn ils mortoris s'augmentads levamain durant il segund onn da pandemia. Unicamain en las regiuns Plaun, Landquart, Plessur e Viamala èn vegnidas dumbradas dapli naschientschas che mortoris. Quai cuntrari a la regiun Surselva che demussa – tranter auter er pervia da la demografia – la bilantscha negativa la pli gronda en la dinamica natirala da la populaziun.
La quota da la populaziun estra en il Grischun è puspè s'augmentada l'onn 2021. Il saldo da migraziun internaziunal da la populaziun grischuna permanenta ha importà l'onn passà tut en tut 1439 persunas. Per la fin da december 2021 avevan pia 19,3 pertschient da la populaziun grischuna ina naziunalitad estra.
Auter sa preschenta la situaziun en connex cun la migraziun interchantunala: damain persunas èn emigradas en auters chantuns che quai ch'i èn immigradas da nov en il Grischun. Giuvnas Grischunas e giuvens Grischuns en scolaziun sco er persunas en ils emprims onns da professiun emigreschan il pli savens. Las gruppas da la populaziun ch'èn datiers da la vegliadetgna da pensiun furman percunter la part la pli gronda da l'immigraziun interchantunala en il Grischun.
Da las vischnancas grischunas profitan Cuira, Landquart ed ina gronda part da la Val dal Rain sco er il Signuradi ed il Partenz Davant d'immigraziuns or da las regiuns perifericas ed or da las vischnancas turisticas. En cifras absolutas demussan oravant tut Tavau, Arosa, Flem e Vaz l'emigraziun la pli gronda entaifer il chantun.
Cumponentas dal svilup da la populaziun en las regiuns grischunas 2021
Damain burgaisas e burgais portugais, dapli burgaisas e burgais tudestgs, talians ed ungarais en il Grischun
Per la fin da l'onn 2021 vivevan 38 856 abitantas ed abitants permanents da naziunalitad estra en il chantun; 749 dapli che l'onn precedent. Entant ch'il dumber da persunas da naziunalitad portugaisa è sa diminuì levamain tranter las diesch gruppas da persunas estras las pli grondas, è s'augmentà il dumber da burgaisas e burgais talians, tudestgs ed ungarais che vivan en il Grischun. 385 persunas che abitan en il chantun han acquistà il dretg da burgais svizzer durant l'onn passà.
Ils detagls davart la populaziun e davart la dinamica demografica da tut las vischnancas e da tut las regiuns stattan a disposiziun sin la pagina d'internet da l'Uffizi per economia e turissem (Statistik und Register).
Infurmaziuns:
Luzius Stricker, manader Statistica e registers, Uffizi per economia e turissem, tel. +41 81 257 23 74, e-mail Luzius.Stricker@awt.gr.ch
Responsabladad: Uffizi per economia e turissem