Far il pass en ina nova fasa da la vita po chaschunar malsegirtad e tschertas sfidas. Quai è dentant er ina schanza! Ensemen cun 37 organisaziuns dilucidescha l'Uffizi da sanadad or da differentas perspectivas ils pass en ina nova fasa da la vita, quai a chaschun da 26 occurrenzas che han lieu dal 1. fin ils 19 da settember 2022.
Tut las persunas fan adina puspè pass en ina nova fasa da la vita. Quai pon esser il daventar ina persuna creschida, la naschientscha u la via en la pensiun – pliras giadas durant la vita stuain nus ans adattar a novas situaziuns ed ans arranschar cun in nov mintgadi. Quests pass en ina nova fasa da la vita han consequenzas per la sanadad psichica. La sfida è quella, d'acceptar e da crescher cun la nova fasa da la vita sco er da colliar sentiments positivs cun tala. Nus tuttas e tuts pudain rinforzar nossa sanadad psichica per dumagnar meglier tschertas sfidas.
La retscha d'occurrenzas «Concepir ils pass en ina nova fasa da la vita» è deditgada a questa tematica. La purschida cumpiglia l'entir chantun e tanscha da films e tocs da teater, sur lavuratoris fin a discussiuns al podium.
Ultra da persunas spezialisadas èn er persunas pertutgadas e confamigliars al lieu. Els tuts mussan ord lur atgna optica strategias per concepir ina nova fasa da la vita sco schanza. Las occurrenzas porschan la pussaivladad da tadlar, da survegnir impuls, da sa barattar e d'emprender d'enconuscher purschidas da sustegn.
Mesiras per promover la sanadad da la populaziun
Circa la mesadad da las persunas pateschan ina giada en lur vita d'ina malsogna psichica. Perquai èsi impurtant ch'ins s'engaschia per l'atgna sanadad psichica e per quella dals conumans. En il chantun Grischun vegn gia per la tschintgavla giada organisada ina retscha d'occurrenzas per rinforzar la sanadad psichica. L'entir program po vegnir consultà sut www.bischfit.ch/2022.
Infurmaziuns:
Denise Rudin, manadra da la partiziun Promoziun da la sanadad e prevenziun, Uffizi da sanadad, tel. +41 81 257 64 02, e-mail Denise.Rudin@san.gr.ch
Responsabladad: Uffizi da sanadad