Il scumond absolut da far fieu vegn abolì per il nord da las Alps grischunas. Il scumond da far fieu al liber resta en vigur en las vals grischunas dal sid.

Las precipitaziuns occasiunalas da las ultimas emnas e cunzunt la sbassada da las temperaturas han reducì il privel d'incendis da guaud e da cultira. L'Uffizi da guaud e privels da la natira po perquai abolir il scumond absolut da far fieu per il nord da las Alps dal Grischun. Tuttina stoi vegnir resguardà ch'ils terrens dals guauds èn anc adina sitgs e ch'il privel d'incendis da guaud è perquai augmentà. Cun grillar ston ins esser fitg precaut. Fieus dastgan vegnir fatgs mo en fuclars fixs e ston vegnir survegliads. Avant che bandunar la plazza da grillar ston ils fieus vegnir stizzads conscienziusamain e dal tuttafatg. Plinavant na dastgan ins betg simplamain bittar davent products da fimar e battafieus.

Il scumond da far fieu vala vinavant en las vals dal sid
En las vals grischunas dal sid n'è la situaziun anc betg sa calmada avunda. Il scumond da far fieu resta perquai anc en vigur en la Mesolcina, en la Val Calanca, en il Puschlav ed en la Bregaglia. Che la situaziun sa calmia dal tuttafatg, dastga vegnir spetgà pir suenter ina perioda da plievgia da durada pli lunga. En cas che las temperaturas s'augmentan puspè e che l'aura resta bella, stoi vegnir fatg quint ch'il privel d'incendis da guaud creschia danovamain. Perquai na poi betg vegnir exclus ch'ins sto lura puspè pronunziar in scumond da far fieu.

En intginas vischnancas valan atgnas disposiziuns da scumonds da far fieu. Questas disposiziuns ston vegnir resguardadas er vinavant!

Ulteriuras infurmaziuns sco er la valitaziun da la situaziun actuala stattan a disposiziun sin la pagina d'internet da l'Uffizi da guaud e privels da la natira.

Infurmaziuns:

Andrea Kaltenbrunner, Surveglianza dal guaud, Uffizi da guaud e privels da la natira, tel. +41 81 257 38 68, e-mail Andrea.Kaltenbrunner@awn.gr.ch

Responsabladad: Uffizi da guaud e privels da la natira