Ils 13 d'october 2022 vegn averta la 79. OLMA a Son Gagl. Per il Grischun è quai ina OLMA speziala, sco chantun envidà dat il Grischun la tempra a la fiera da quest onn. Il «Di dal chantun envidà», cun il til tradiziunal da la OLMA tras la citad da Son Gagl e cun l'act festiv, sa preschenta il Grischun cun sia diversitad magnifica. Ultra da quai envida il Grischun las visitadras ed ils visitaders a l'exposiziun speziala «Mund d'aventuras dal Grischun». Quella pon ins visitar durant ils 11 dis da la OLMA, pia fin ils 23 d'october 2022.

La OLMA sco fiera publica la pli gronda da la Svizra ed il chantun Grischun envidà han blers tratgs cuminaivels: Da tradiziuns e d'animals fin a novaziuns ed inscunters datti bler da scuvrir l'october 2022 – e quai cun blera participaziun grischuna. A la OLMA vegnan las visitadras ed ils visitaders a vesair, co ch'ins viva, discurra, lavura, emprenda, perscrutescha, giauda il temp liber e producescha delicatessas culinaricas en il chantun il pli grond da la Svizra.

Mund d'aventuras dal Grischun en la halla 9.1.2
En l'exposiziun speziala dal Grischun pon las visitadras ed ils visitaders entrar en il «Mund d'aventuras dal Grischun». En la halla 9.1.2 na pon ins betg mo scuvrir attracziuns turisticas, mabain er innovaziuns ed auta tecnologia sco er artisanadi tradiziunal e rastels. Il Grischun vegn a sa preschentar en trais linguas ed a mussar sia particularitad – «simplamain da nar!».

Enturn la plazza dal vitg en l'exposiziun speziala frunta tradiziun sin innovaziun. Las visitadras ed ils visitaders vesan, co ch'ins po cumbinar bits cun bytes e cun bikes en il Grischun. Al martgà da spezialitads vegnan plinavant offridas intginas delicatessas dal Grischun. En il lavuratori mussan interpresas grischunas artisanadi nov e vegl.

A la OLMA emprendan las visitadras ed ils visitaders er, co che la trilinguitad vegn vivida e l'avegnir economic vegn concepì en il chantun da la Svizra cun la surfatscha la pli gronda. Tranter auter, perquai ch'ins chatta er la furmaziun e la perscrutaziun en las vals grischunas.

E betg sco ultim daventa il Mund d'aventuras dal Grischun il grond lieu d'entupada da las Grischunas e dals Grischuns: Sajan quai purs u laborantas, en il Mund d'aventuras dal Grischun inscuntra il public passa 100 persunalitads interessantas e totalmain differentas dal Grischun.

Di dal chantun envidà ils 15 d'october 2022
Sonda, ils 15 d'october 2022, n'è betg mo il chantun Grischun giast d'onur a Son Gagl – mabain er la populaziun grischuna: Cun paucas e trumbettas vegn festivà il «Di dal chantun envidà». La damaun vegn celebrà il til grischun. A partir da las 10.00 marschan, chantan e sautan passa 1000 participantas e participants dal Grischun – tranter auter 13 furmaziuns da musica – tras las vias da Son Gagl. Els preschentan 11 temas cun 55 sujets, che mussan la ritgezza da las linguas e da las tradiziuns, la diversitad da las vischnancas sco er da l'economia, dal sport e da la cultura. Quai vegn ad esser in spectacul commovent dal e per il Grischun.

Il suentermezdi envida il Grischun a l'act festiv en l'arena da la OLMA. Cun in viadi musical tras il Grischun vegn purschida in'aventura speziala che va sut la pel. Ina chanzun populara rumantscha vegn interpretada ed inscenada cun musica populara, jodel, musica da flad, rap, hip hop, chant da chor e musica classica. Annina Campell e Lorenzo Polin modereschan l'occurrenza e mainan las visitadras ed ils visitaders sin in viadi plain surpraisas. «Simplamain da nar!», tge ch'il chantun Grischun ha da porscher.

Fifferlotta curra per il Grischun
In punct culminant dal program da mintga OLMA ed in toc cultura da la OLMA è la cursa legendara da purschels. Mintga di a las 16.00 sa mettan ils purschels en lingia per currer tras l'arena. Els attiran il public e procuran per ina grondiusa atmosfera e per bleras scumessas. Las Grischunas ed ils Grischuns scumettan e sustegnan natiralmain la «Fifferlotta», il purschè dal chantun Grischun che ha in num rumantsch.

Averta per il public vegn la OLMA gievgia, ils 13 d'october 2022, a las 09.00. A la festa d'avertura dals giasts envidads offra il Grischun in grond giudiment cultural. Blera musica dal Grischun e da Son Gagl, sco er ils pleds da bainvegni dal president da la Confederaziun Ignazio Cassis e dal president da la Regenza grischuna Marcus Caduff èn dus dals puncts culminants da la festa d'avertura per ils giasts envidads.

Ulteriuras infurmaziuns davart la preschentaziun ospitanta dal Grischun a la OLMA 2022 vegnan publitgadas cuntinuadamain sin la pagina d'internet https://olma22.gr.ch.

Fotografia:

Agiunta:

Visualisaziun «Mund d'aventuras dal Grischun»: © Daniel Huber Architektur & Martin Renner Projektcoaching

Infurmaziuns:

• Marcus Hassler, secretari general, Departament d'economia publica e fatgs socials, tel. +41 81 257 23 12, e-mail Marcus.Hassler@dvs.gr.ch (cuntanschibel da las 11.30 fin las 13.00)
• Daniel Camenisch, manader da project per la preschentaziun ospitanta dal chantun Grischun, tel. +41 81 661 20 20, e-mail camenisch@vinavant.ch (cuntanschibel da las 13.00 fin las 15.00)

Responsabladad: Departament d'economia publica e fatgs socials