Oz en damaun è vegnì realisà a Son Gagl in record mundial dal gener il pli delizius. Il Grischun sco chantun envidà a la OLMA ha preschentà il pli lung capun dal mund al til da la OLMA tras Son Gagl. 17 meters lunga era la delicatessa grischuna.
«Simplamain da nar!» Quai n'è betg mo il motto dal Grischun sco chantun envidà a la OLMA actuala a Son Gagl. Da nar grond è stà er il capun ch'il Grischun ha preschentà oz en damaun al cumenzament dal til da la OLMA: entirs 17 meters lung! Bain n'è inscrit nagin record mundial da capuns en il cudesch da records Guinness. In record inuffizial è però enconuschent en il Grischun. El è vegnì realisà l'onn 2018. Il capun ch'ins ha producì quella giada aveva ina lunghezza da 16,44 meters.
Dal Partenz en il center da la citad da Son Gagl
Producì il capun da record mundial ha la Graubünden Vivonda SA che maina il center da cumpetenza graubündenVIVA a Jenaz. Il capun da record è vegnì preproducì a Jenaz dapi mez da questa emna ed oz a bun'ura a las 03.00 è el vegnì plegà en a fin. A las 05.00 è in tractor ì en il Partenz per la spezialitad da 17 meters lunghezza. Sin la punt dal tractor è il capun vegnì transportà en circa 3 uras sur straduns e sur vias lateralas da Jenaz a Son Gagl.
Avant il til da la OLMA è la delicatessa da record mundial vegnida stgaudada cun in buglion da latg sper la staziun da martganzia da Son Gagl. Il capun gigantic è però stà da vesair en plaina lunghezza mo al cumenzament dal til. Pli ditg ch'il cortegi ha durà, e pli curt ch'il capun è daventà. Durant il til han las producentas dal capun grischun enturn las manadras da la fatschenta Graubünden Vivonda Bablina ed Andrina Caprez taglià il capun en buccadas. Quellas èn lura vegnidas repartidas da studentas e students da la Scola d'hotellaria Passugg a las ordvart bleras persunas dal public. Tut en tut ha il Grischun dastgà repartir var 1000 tocs dal capun a las visitadras ed als visitaders dal cortegi grischun. Durant l'entir process da la producziun fin a la repartiziun al public dal til è la pli gronda sfida stada quella, da tegnair chaud il capun durant il cortegi tras Son Gagl.
Pais da 45 kilos
Il capun da record mundial è vegnì fatg cun ingredienzas grischunas: farina da furment da Casti, urtais da Malans, charn da Ramosch. Il capun aveva ensemen cun il buglion da latg in pais da circa 45 kilos.
La OLMA è la fiera publica la pli gronda da la Svizra. Ella dura anc fin ils 23 d'october. En il Mund d'aventuras dal Grischun, en la halla 9.1.2, preschenta il chantun envidà sia singularitad – la trilinguitad, «simplamain da nar!». Ultra da quai è l'agricultura grischuna represchentada cun passa 50 animals en la halla 7 da la OLMA. Ils animals vegnan mussads regularmain er en l'Arena da la OLMA.
Ulteriuras infurmaziuns davart la preschentaziun ospitanta dal Grischun a la OLMA 2022 chattais Vus sin la pagina d'internet https://olma22.gr.ch.
Fotografias gratuitas dal capun da record mundial:
Download: https://olma22.gr.ch/medienbilder
Funtauna: Grischun – chantun ospitant
Fotografias agiuntadas:
Foto 3 | Foto 4
Infurmaziuns:
Daniel Camenisch, manader da project per la preschentaziun ospitanta dal chantun Grischun, tel. +41 81 661 20 20, e‑mail camenisch@vinavant.ch
Responsabladad: Departament d'economia publica e fatgs socials