En Svizra assista mintga quarta persuna ses confamigliars. Persunas che assistan e tgiran lur confamigliars sustegnan regularmain ina persuna cun restricziuns da la sanadad u da l'autonomia en il mintgadi. Ils 30 d'october 2022, il Di interchantunal dals confamigliars che gidan, engrazian plirs chantuns – er il Grischun – cun in'acziun a favur da las persunas che assistan e tgiran.

Las persunas che assistan lur confamigliars giogan ina rolla decisiva en nossa societad. Savens pon persunas pli veglias, malsaunas u impedidas abitar vinavant a chasa mo grazia al sustegn da lur famiglia. Praticamain mintgina e mintgin da nus enconuscha en ses conturn insatgi che surpiglia incumbensas d'assistenza. Bleras e blers accumpognan schizunt sezzas u sezs ina persuna cun restricziuns da la sanadad u da l'autonomia.

Per pudair sustegnair meglier la lavur preziusa da las persunas che assistan e tgiran lur confamigliars sco er per dar ad ellas dapli renconuschientscha e stima, elavura l'Uffizi da sanadad actualmain in plan d'acziun. Il plan d'acziun grischun duai prevair purschidas da distgargia e da sustegn per pussibilitar in engaschament duraivel dals confamigliars e per evitar situaziuns da surpretensiun en las famiglias. Plinavant duai il plan d'acziun preschentar mesiras per indemnisar ils confamigliars che reduceschan lur activitad da gudogn per assister e per tgirar lur confamigliars.

Pitschen congedi ils 30 d'october 2022 per las persunas che assistan lur confamigliars
Ils 30 d'october, il Di dals confamigliars che gidan, engrazia l'Uffizi da sanadad, ensemen cun differentas organisaziuns spezialisadas, cun in café a tut quellas persunas che s'engaschan di per di per lur confamigliars ch'èn malsauns e che dovran assistenza. Er famiglias e persunas interessadas èn envidadas cordialmain. L'acziun duai esser in'occasiun per las persunas che assistan e tgiran lur confamigliars, da sa permetter ina pitschna pausa. Cun l'acziun vul l'Uffizi da sanadad render attent ch'igl è – gist per las persunas che tgiran lur confamigliars – impurtant da pensar er a sasezzas e da tancar nova energia, per er sezzas restar saunas.

L'engaschament quotidian da las persunas che assistan lur confamigliars duai daventar visibel e vegnir undrà. «Mintgina e mintgin po porscher maun a las persunas che assistan lur confamigliars e sa participar a las incumbensas dal mintgadi u cuir ad ellas in congedi», uschia il cusseglier guvernativ Peter Peyer.

Sche las persunas che assistan lur confamigliars cundividan lur istorgia en las raits socialas cun il hashtag #DankeAngehoerige, pon ellas inspirar autra glieud da render visiblas las persunas che gidan. La campagna vegn purtada dals chantuns Genevra, Vad, Friburg, Giura, Neuchâtel, Vallais, Tessin, Berna e Grischun.

Pussaivladads da sustegn e da distgargia
Sin la plattafurma chantunala d'infurmaziun www.angehoerige-betreuen.gr.ch chattan las persunas che assistan lur confamigliars tut las infurmaziuns davart il Di dals confamigliars che gidan e davart ils cafés participads. Las organisaziuns spezialisadas che figureschan sin la pagina d'internet èn al lieu e stattan a disposiziun per dumondas e per in barat.

Sin la plattafurma chattan ils confamigliars plinavant infurmaziuns davart las pussaivladads existentas da distgargia persunala u da sustegn finanzial, dentant er cussegls per la cumpatibilitad cun l'activitad da gudogn. Ils patruns pon s'infurmar davart ils dretgs e las obligaziuns e survegnan ideas per pudair sustegnair las lavurantas ed ils lavurants en situaziuns difficilas. In element impurtant da la plattafurma è la banca da datas cumplessiva dals contacts e da las adressas dals servetschs da sustegn.

Infurmaziuns:

Responsabladad: Uffizi da sanadad