Il Grischun guarda enavos sin 11 dis grondius sco chantun ospitant a la OLMA a Son Gagl. Sco emprim chantun dapi l'erupziun da la pandemia ha il Grischun preschentà sia entira diversitad e varietad a las visitadras ed als visitaders da la OLMA. Il chantun sa legra «da nar» da la preschentaziun zunt appreziada en la vitrina attractiva da l'exposiziun publica la pli gronda da la Svizra. Per lur preschentaziun han ils organisaturs grischuns retschavì mo resuns positivs.
La OLMA 2022 è passada ed uschia er la preschentaziun ospitanta dal chantun Grischun. A la OLMA ha il Grischun pudì sa mussar davant bleras visitadras e blers visitaders da tut la Svizra. Var 320 000 persunas han visità dals 13 fin ils 23 d'october 2022 l'areal da la OLMA.
Il president dal comité d'organisaziun da la preschentaziun ospitanta, il president da la Regenza Marcus Caduff, tira in facit dal tuttafatg positiv da la preschentaziun a Son Gagl. «A Son Gagl ha il chantun Grischun laschà fastizs ch'èn segir anc da sentir in detg temp. Igl è gartegià da svegliar emoziuns positivas e d'intgantar las visitadras ed ils visitaders per noss chantun.» Marcus Caduff è fitg cuntent cun ils blers resuns positivs. Durant ils ultims 11 dis han quels motivà tut las persunas ch'èn stadas participadas a la preschentaziun ospitanta dal Grischun.
Il Grischun sco chantun ospitant ha fatg puncts a Son Gagl
Ils resuns suenter la festa d'avertura cun ses arranschament curaschus èn stads tuts ordvart positivs. Vegnids accentuads èn adina puspè ils effects da surpraisa frestgs ed expressivs tras las duas chauras capricorn Nesa e Nina. Al «Di dal chantun ospitant» è il Grischun sa preschentà sco chantun vital, optimistic e creativ. Il til grischun cun passa 1100 participantas e participants da tut las valladas grischunas ha intgantà il grond public e procurà per bler applaus. 55 temas grischuns e 13 furmaziuns musicalas han purschì in spectacul commovent en il center da la citad da Son Gagl. Cun in viadi musical tras il Grischun, ch'è vegnì preschentà per l'emprima giada en questa furma, ha l'act festiv grischun purschì in'aventura emoziunala. La chanzun populara rumantscha «La sera sper il lag» è vegnida interpretada cun musica populara, jodel, musica instrumentala, rap, hip hop, chant da chor e musica classica. Il punct culminant: la preschentaziun sco ovra cumplessiva a la fin da l'act festiv.
En la halla 9.1.2 èn las visitadras ed ils visitaders entrads en il «Mund d'aventuras dal Grischun». Gia il di d'avertura – cun la visita dal president da la Confederaziun Ignazio Cassis – è quest «mund» s'etablì sco lieu d'inscunter apprezià ed animà. Ina gronda part da las 320 000 visitadras e visitaders n'ha betg manchentà in gir tras il «Mund d'aventuras dal Grischun». Sco interpretaziun moderna e quieta cun ina buna maschaida d'emoziuns e d'infurmaziuns ha quest «mund» gì in bun resun. Grischunas e Grischuns raquintan er d'inscunters cordials cun glieud da tut las generaziuns e da blers chantuns.
En la halla 7 ed en l'arena da la OLMA èn ils animals da niz da l'agricultura da tut las regiuns dal Grischun stads en il focus. Sis razzas da d'arments da charn, tschintg razzas da vatgas da latg sco er tschintg razzas da chauras e quatter razzas da nursas èn vegnidas mussadas al public. Plinavant ha il Plantahof preschentà tschintg tips da chauns en il rom da demonstraziuns da la protecziun da muntaneras.
La buna collavuraziun cun las «Exposiziuns OLMA Son Gagl» è stada il fundament per la preschentaziun reussida. Katrin Meyerhans, manadra dal sectur «Exposiziuns» da la OLMA, è stada intgantada da la preschentaziun curaschusa dal giast d'onur. Il Grischun saja stà in chantun ospitant che haja muventà e surprendì las visitadras ed ils visitaders cun ses umor, cun sia diversitad e cun sia originalitad.
In grond engraziament al comité d'organisaziun sco er a tut las participantas ed ils participants
Contribuì al bun success a Son Gagl han tut las Grischunas ed ils Grischuns ch'èn s'engaschads cun corp ed olma per il project. Il project è vegnì realisà sut la direcziun dal president da la Regenza Marcus Caduff (president dal comité d'organisaziun) e d'ina gruppa da project cun Daniel Camenisch (direcziun generala dal project) sco er dals manaders dals projects parzials Christian Klucker (avertura), Andy Kollegger (di dal chantun ospitant), Martin Renner e Daniel Huber (exposiziun speziala) e Christian Parli (exposiziun d'animals). Il chantun engrazia a tut las participantas ed ils participants per lur engaschament prezius da e per il Grischun – simplamain da nar!
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. + 41 81 257 23 01 (cuntanschibel da las 10.00 fin las 11.00), e-mail Marcus.Caduff@dvs.gr.ch
Fotos gratuitas da la preschentaziun grischuna a la OLMA:
Download: https://olma22.gr.ch/medienbilder
Funtauna: Grischun – chantun ospitant
Ulteriuras infurmaziuns davart la preschentaziun ospitanta dal Grischun a la OLMA 2022: https://olma22.gr.ch
Responsabladad: Departament d'economia publica e fatgs socials