La Regenza grischuna ha nominà Raphael Pfiffner sco nov manader da l'Administraziun chantunala da finanzas. El vegn a surpigliar questa funcziun il 1. da matg 2023.

La Regenza grischuna ha elegì Raphael Pfiffner, da Mädris-Vermol, domicilià a Flums, sco nov manader da l'Administraziun da finanzas. El succeda a Fabian Disch che mida il 1. da december 2022 en l'economia privata.

Raphael Pfiffner ha 41 onns ed ha fatg in Master of Science (MSc) en entrepreneurship (Major Finance) a l'Universitad da Liechtenstein, in diplom en tecnica da sistems (insch. dipl. SAS) a la Scola auta interstatala per tecnica a Buchs sco er furmaziuns supplementaras en finanzas, controlling e management. Dapi l'october 2020 maina el las finanzas e la ICT da la vischnanca da Flums ed è commember dal cussegl d'administraziun dals Servetschs d'informatica da la regiun da Sargans (idsl). Avant ha el gì differentas funcziuns directivas en ils secturs da finanzas, dad ICT e da HR en l'economia privata.

L'Administraziun da finanzas è responsabla per ils fatgs centrals da finanzas e da contabilitad sco er per il rendaquint da l'administraziun chantunala. Tar las incumbensas impurtantas tutgan er la budgetaziun ed il management da la tresoraria. Plinavant è l'Administraziun da finanzas l'autoritad da surveglianza da las fundaziuns classicas, il post spezialisà central dals fatgs d'assicuranza dal chantun ed il post da coordinaziun per la realisaziun da la public corporate governance.

L'Administraziun da finanzas è in post da servetsch dal Departament da finanzas e vischnancas.

Fotografia agiuntada:

Infurmaziuns:

Cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch

Responsabladad: Regenza