Cun il consentiment da l'Uffizi federal d'ambient (UFAM) ordinescha il chantun Grischun da sajettar tut en tut trais ulteriurs lufs dals dus trieps dal Beverin e dal Wannaspitz. Tranter auter duai vegnir sajettà er l'animal «M92», il luf-bab dal triep dal Beverin.

Per regular la populaziun da lufs èn vegnids sajettads quest onn gia dus lufs giuvens dal triep dal Beverin ed in luf giuven dal triep dal Wannaspitz. La stad, durant che las alps eran chargiadas, èn vegnids confermads tant per il triep dal Beverin sco er per il triep dal Wannaspitz dapli chagniels che quai che emprimas observaziuns avevan laschà supponer. Tar il triep dal Beverin èn vegnids cumprovads la fin d'avust set chagniels, tar il triep dal Wannaspitz han ins pudì dumbrar il settember sis chagniels. Tenor la legislaziun federala da chatscha dastgan ins sajettar fin la mesadad da quests animals giuvens en il rom d'ina regulaziun dals trieps. Il UFAM ha approvà ils 28 d'october 2022 las dumondas correspundentas dal chantun. Ultra dal luf giuven gia sajettà dastgan pia vegnir sajettads dus ulteriurs lufs giuvens dal triep dal Wannaspitz.

Il luf-bab dal triep dal Beverin duai vegnir sajettà
Perquai ch'ins ha pudì cumprovar ina cifra da reproducziun pli gronda tar il triep dal Beverin, èsi vegnì permess da sajettar – ultra dals dus animals sajettads gia la fin da fanadur – in terz luf da quest triep. Vegnir sajettà dastga ubain in ulteriur luf giuven ubain il luf-bab «M92». Cunquai ch'il luf-bab «M92» ha demussà in cumportament spezialmain problematic, duai el vegnir sajettà sco terz luf da quest triep.

Il luf-bab dastga vegnir sajettà fin ils 31 da schaner 2023; il termin per sajettar ils lufs giuvens scada ils 31 da mars 2023.

Infurmaziuns:

Arno Puorger, collavuratur academic Animals da rapina gronds, Uffizi da chatscha e pestga, tel. +41 81 257 87 67 (cuntanschibel tranter las 09.30 e las 11.30), e-mail Arno.Puorger@ajf.gr.ch

Responsabladad: Uffizi da chatscha e pestga