Dapi l'onn 2017 maina la Quant SA da Flem il secretariat da la marca «graubünden». La Regenza prolunghescha quest mandat per ils onns 2023 fin 2025 cun in import maximal da circa 1,79 milliuns francs. Ultra da quai conceda la Regenza ina contribuziun chantunala da maximalmain 1 milliun francs per onn al secretariat da la marca «graubünden» ed a l'uniun Grischun Vacanzas per realisar ils onns 2023 fin 2026 la campagna da marca «Enavant».

Cun sviluppar vinavant il project da success da la marca «graubünden» sa concentrescha la Regenza sin cuntinuitad. Durant ils ultims onns ha il secretariat pudì crear basas fundadas per sviluppar vinavant la marca ed ha cuntanschì in bun stadi areguard la tgira da partenarias e partenaris vertents sco er novs. Actualmain ha la marca «graubünden» passa 70 partenarias e partenaris licenziads da differentas branschas e da tut il chantun.

In dals terms impurtants da l'istorgia da la marca è l'offensiva da communicaziun «Enavant» ch'è vegnida lantschada il 2007 e ch'è vegnida premiada diversas giadas. Ils capricorns Gian e Giachen, che san discurrer, han cuntanschì status da cult ed influenzeschan marcantamain la percepziun positiva dal Grischun. Quai mussan studis periodics davart la marca «graubünden». Cun l'orientaziun da la marca sco «NaturMetropole graubünden» è plinavant vegnida fixada il 2013 ina finamira che duai permetter al Grischun er en l'avegnir, d'avair success en la concurrenza naziunala ed internaziunala da las regiuns. La designaziun «NaturMetropole» stat per ina spessa accumulaziun d'aventuras d'auta qualitad en la natira ed en la cultura che caracteriseschan, distinguan e differenzieschan il Grischun da ses concurrents. La marca «graubünden» vegn pia duvrada durant ils proxims onns sapientivamain er ordaifer il sectur turistic per accentuar tut las fassettas da la marca dal lieu: «viver e lavurar», «innovaziun e talents», «furmar e perscrutar» ed uschia vinavant.

© Quant SA

La Regenza conceda a l'Uniun Landwasserwelt ina contribuziun chantunala da maximalmain 2,9 milliuns francs per realisar il project «Landwasserwelt Graubünden». Quai sut il titel da las «infrastructuras relevantas per il sistem». La contribuziun chantunala vegn concedida sut la cundiziun che la finanziaziun totala saja segirada. Latiers tutga er ina decisiun dal cussegl d'administraziun da la Viafier retica SA. Las vischnancas d'Alvra, Bravuogn Filisur, Schmitten e Tavau han concludì gia la stad 2021 da sustegnair finanzialmain il project.

Cun quest project vul la regiun Alvra trair a niz meglier il potenzial turistic enturn il viaduct da la Landwasser. Per quest intent ha ella elavurà in masterplan turistic en collavuraziun cun ils purtaders dal project (Viafier retica, vischnancas d'Alvra, Bravuogn Filisur, Tavau e Schmitten, Grischun Vacanzas, Uniun Parc Ela ed Uniun Patrimoni mundial Viafier retica). Quest masterplan prevesa da render accessibels e perceptibels per in public pli vast ils temas «cultura da viafier» e «patrimoni mundial da la UNESCO Viafier retica». Quai cun intermediar ed inscenar cumplementarmain temas regiunals tipics. Il territori d'aventuras s'extenda en la Val d'Alvra da Filisur fin Alvagni Bogn sco er fin la Zügenschlucht a Tavau Wiesen e fin la staziun da Bravuogn.

© Viafier retica

La Regenza ha approvà la revisiun parziala da la planisaziun locala che la vischnanca da Tavau aveva concludì ils 13 da zercladur 2021. Tras la revisiun vegnan stgaffidas las premissas per spustar ina pista en il territori «Palüda / Salzgäba». La pista stretga plain stortas, che maina dal territori da skis Parsenn giu Tavau Vitg duai vegnir optimada. In trassé pli direct fin la fin da la pista è da grond avantatg per las persunas che van cun skis e cun snowboard, ma er per la preparaziun da la pista. I resulta ina pista attractiva e segira. Per spustar la pista èsi necessari da modifitgar il terren sin ina surfatscha da var 3000 meters quadrat. En il sectur «Palüda» duai la pista la finala vegnir ennavada sin ina surfatscha da circa 10 160 meters quadrat.

© swisstopo