L'Uffizi per il svilup dal territori avra oz la procedura da cooperaziun publica per la revisiun d'in chapitel dal Plan directiv chantunal. Las adattaziuns stattan en connex cun il Program d'aglomeraziun Cuira. Il Plan directiv chantunal fixescha il rom per realisar en moda coordinada las mesiras dal Program d'aglomeraziun. Quest rom è liant per las autoritads.
Il settember 2021 è il Program d'aglomeraziun vegnì inoltrà a la Confederaziun per l'examinaziun. Emprims resultats provisorics da l'examinaziun èn vegnids publitgads il zercladur 2022 a chaschun da la consultaziun tar il credit d'impegn. La Confederaziun prevesa da sustegnair il Program d'aglomeraziun Cuira cun 35 milliuns francs. Mess en relaziun cun il dumber d'abitantas e d'abitants è quai la contribuziun federala la pli auta en l'entira Svizra en la categoria da las aglomeraziuns mesaunas e pitschnas.
Contribuziuns federalas per projects impurtants
Sustegnids vegnan projects impurtants, sco per exempel il vial per sviar a sanestra al Rosenhügel, las amplificaziuns da las staziuns, la concepziun da las bleras vias da transit tras ils vitgs tenor ils basegns dals abitadis sco er la gronda part da las mesiras a favur dal traffic betg motorisà. Ils rapports d'examinaziun detagliads cun indicaziuns davart las singulas mesiras parzialas vegnan publitgads da la Confederaziun la fin da favrer. Il Parlament federal deliberescha ils meds finanzials federals la fin da l'onn 2023. Las mesiras vegnan realisadas ils onns 2024 fin 2028.
Definir las mesiras en moda lianta
Per pudair far valair ils meds finanzials federals ston il Program d'aglomeraziun Cuira sco er sias mesiras relevantas per il territori vegnir determinads en il Plan directiv chantunal en moda lianta per las autoritads. Tras l'adattaziun dal chapitel «Programs d'aglomeraziun» ademplescha il chantun questa premissa.
Ils documents d'exposiziun pon vegnir consultads sin la pagina d'internet www.are.gr.ch sut «Actualitads».
L'exposiziun publica dals documents sin palpiri ha lieu dals 11 da november fin ils 12 da december 2022 en l'edifizi administrativ Sinergia a la Ringstrasse 10 a Cuira. Dals documents d'exposiziun pon ins prender invista durant las uras da biro uffizialas (annunzia per telefon sut +41 81 257 50 55).
Durant il temp d'exposiziun po mintgina e mintgin prender posiziun. Las propostas ed objecziuns ston vegnir inoltradas en scrit e cun la remartga «Program d'aglomeraziun PDChant» fin il pli tard ils 12 da december 2022 sin via electronica ad info@are.gr.ch u per posta a l'Uffizi per il svilup dal territori, Ringstrasse 10, 7001 Cuira.
Infurmaziuns:
Dr. Boris Spycher, manader da project / collavuratur scientific, Uffizi per il svilup dal territori, tel. +41 81 257 23 06, e-mail Boris.Spycher@are.gr.ch
Responsabladad: Uffizi per il svilup dal territori