La Regenza conceda als partenaris dal Swiss Epic Grischun ina contribuziun chantunala annuala da 160 000 francs per la realisaziun planisada da l'event da mountainbike internaziunal «SPAR Swiss Epic Grischun» dals onns 2024 fin 2026. Diversas destinaziuns en Svizra ed en il territori alpin surpigliassan gugent questa occurrenza. Fin la fin dal 2022 vegn l'organisatura dal Swiss Epic (Ironman Switzerland SA) a prender ina decisiun a favur dal Grischun, premess che las participaziuns finanzialas da las destinaziuns e dal chantun pon vegnir garantidas fin lura.

La «Epic-Series» cumpiglia las meglras cursas da mountainbike en etappas dal mund che han lieu sin trais continents. Il punct culminant da la stagiun è il «Absa Cape Epic» en l'Africa dal Sid, il qual vala sco il «Tour de France dal sport da mountainbike». Il Swiss Epic duai er en l'avegnir – suenter las quatter ediziuns dals onns 2019 fin 2022 – avair lieu en Grischun. L'avust u il settember vegnan spetgads mintgamai durant in'emna var 800 fin 1000 participantas e participants (profis ed amaturs) da circa 40 naziuns sco er var 600 persunas accumpagnantas, uschia ch'ins po far quint cun circa 10 000 pernottaziuns.

© Davos Destinations-Organisation

Ensemen cun la Confederaziun sustegna la Regenza l'engrondiment dal bogn da wellness e da divertiment Bogn Sedrun. Per quest intent conceda ella a la vischnanca da Tujetsch contribuziuns chantunalas en la summa totala da var 800 000 francs sut il titel «infrastructuras relevantas per il sistem» e sco prestaziun equivalenta a l'emprest federal (1,065 milliuns francs) en il rom da la Nova politica regiunala (NPR).

Quest project cuntegna ultra da la renovaziun da l'entir bogn cuvert er in engrondiment dal spazi d'uffants ed ina nova glischnera or en il liber. Cun l'engrondiment dal Bogn Sedrun, che augmenta a medem temp l'attractivitad dal bogn, duai vegnir rinforzada per il futur ina purschida turistica impurtanta che vegn er duvrada dals giasts da Mustér, dad Andermatt e da la Val dal Blegn. En connex cun il resort Dieni ch'è planisà a Sedrun – nua ch'igl è previs mo in pitschen sectur da wellness e nagin bogn cuvert – survegn il Bogn Sedrun ina gronda impurtanza turistica.

 

© Vischnanca da Tujetsch

La Regenza dat glisch verda a la fundaziun «am Rhein» per il manaschi regular da l'Ospizi grischun. En il rom d'ina emprova da pilot maina la fundaziun gia dapi il 2019 l'ospizi cun quatter letgs a Maiavilla. Dapi il cumenzament è la dumonda adina gronda. L'occupaziun durant ils onns 2019 fin 2021 è stada en media 88 pertschient. Durant quest temp èn 94 persunas vegnidas tgiradas ed assistidas palliativamain durant lur ultima fasa da la vita. L'onn 2020 è l'occupaziun schizunt stada passa 95 pertschient. Quai mussa ch'igl exista in basegn per in ospizi en il chantun Grischun e ch'ina largia da provediment impurtanta ha pudì vegnir serrada.

Per il 1. da schaner 2023 po la fundaziun «am Rhein» ussa cumenzar cun il manaschi regular. Sa basond sin la Lescha per promover la tgira da persunas malsaunas garantescha la Regenza per quest intent ina contribuziun chantunala annuala da maximalmain 400 000 francs.

© fundaziun «am Rhein»

La Regenza ha approvà in project da sanaziun cunter la canera en la vischnanca dad Ilanz/Glion. Quest project cumpiglia las vias chantunalas Via da l'Alpsu, Via da Ladir, Via da la Lumnezia, Via Sursilvana, Via da Siat e Via da Val S. Pieder sco er las vias communalas Via Porta Sura, Via Sontga Clau Sura, Via Sontga Clau Sut, Via Santeri, Bahnhofstrasse, Rathausgasse e Städtlistrasse. En il rom dal project da sanaziun cunter la canera conceda la Regenza la permissiun da reducir la sveltezza maximala generala dad 80 km/h u da 60 km/h sin 50 km/h respectivamain da 50 km/h sin 30 km/h.

Pervia dal surpassament da las limitas d'immissiuns exista in basegn da sanaziun per las vias numnadas qua survart. Il chantun e las vischnancas sco proprietaris da las vias correspundentas èn obligads da realisar la sanaziun cunter la canera. Il project da sanaziun cumpiglia tut las vias chantunalas ch'èn relevantas areguard la canera ed uschia tut ils territoris da la vischnanca dad Ilanz/Glion, per las qualas igl è vegnì chattà ina grevezza da canera considerabla sin fundament dal cataster da la grevezza da canera.