En il chantun Grischun duai vegnir endrizzà in post spezialisà chantunal per il management da smanatschas. Quest post duai identifitgar e giuditgar ad uras svilups privlus da persunas. Acts potenzials da violenza pon uschia vegnir impedids. La Regenza ha approvà il project correspundent e surdà l'incarica d'elavurar la basa legala. Il post spezialisà duai vegnir domicilià tar la Polizia chantunala dal Grischun.
Il Management chantunal da smanatschas (MCS) ha la finamira d'identifitgar ad uras svilups privlus da persunas, da giuditgar quests svilups e d'intervegnir cunter tals en cas da basegn. Plinavant duai vegnir meglierada la protecziun da persunas pertutgadas da violenza sco er da persunas e d'instituziuns en mira. Sch'igl exista ina ristga pli gronda per in act da violenza, duai quest act vegnir impedì tras il Management da smanatschas. La finamira èn soluziuns a lunga vista senza violenza.
Prevenziun tar tut las furmas da violenza
Il Management chantunal da smanatschas na s'occupa betg mo da la violenza a chasa e dal stalking, mabain sa drizza cunter tut las furmas da violenza (en spezial smanatschas cunter scolas, cunter l'administraziun u cunter autras instituziuns, ma er extremissem violent e radicalisaziun). Cun ina moda da lavurar prospectiva ed analitica che s'orientescha a l'acziun duai il Management chantunal da smanatschas plinavant proteger las persunas pertutgadas da violenza. El ha er ina funcziun da cussegliaziun e duai abilitar las persunas pertutgadas da violenza, las collavuraturas ed ils collavuraturs d'autoritads e d'instituziuns sco er las persunas spezialisadas d'ir enturn cun persunas che han in cumportament smanatschant agressiv u ch'èn latentamain privlusas.
Il MCS duai vegnir organisà tras in team central interdisciplinar che sa cumpona da persunas spezialisadas da la polizia, da la psicologia forensica e da la lavur sociala. Tut las instituziuns essenzialas duain mintgamai esser represchentadas en ils teams da crisa e da cas tut tenor la tematica. Enconuschientschas existentas e novas valurs d'experientscha duain vegnir resguardadas d'in cuntin cun scolar regularmain las collavuraturas ed ils collavuraturs.
La Svizra è a la testa dal management da smanatschas
En il sectur dal management da smanatschas vala la Svizra sco pajais predominant en l'Europa. La gronda part dals chantuns ha gia in management da smanatschas. En il chantun Grischun è il management da smanatschas actualmain anc reglà en moda decentrala. Ils singuls secturs s'organiseschan en quest reguard en moda independenta. En ils cas enconuschents collavuran els dentant gia oz.
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 12.30 fin las 14.00), e-mail Peter.Peyer@djsg.gr.ch
Responsabladad: Departament da giustia, segirezza e sanadad