Pervia dals numerus laviners da la vart sanestra da la val tranter Segl-Föglias e Plaun da Lej sto la via da Malögia vegnir serrada regularmain per motivs da segirezza. Fin ch'ina varianta da tunnel stabla è realisada, procuran a partir d'immediat sis pitgas per siglientar lavinas per dapli segirezza. Il cumenzament da november ha l'Uffizi da construcziun bassa prendì en funcziun quellas.

Il traject da la via da Malögia tranter Segl-Föglias e Plaun da Lej ha ina lunghezza da 3,5 kilometers e sto savens vegnir serrà a curta vista durant pliras uras u plirs dis pervia d'in privel da lavinas pli grond. La soluziun a lunga vista, che vegn persequitada actualmain, prevesa da construir in tunnel en cumbinaziun cun indrizs fixs per siglientar lavinas e cun rempars per proteger ils portals dal tunnel.

Sis pitgas per siglientar lavinas e surveglianza cun radar
Perquai ch'i vegn quintà cun in lung spazi da temp per realisar la varianta da tunnel, ha l'Uffizi da construcziun bassa (UCB) sin giavisch da las vischnancas e dal chantun prendì mesiras per reducir las ristgas durant il temp transitoric (communicaziun a las medias dals 24 da favrer 2022 sco er communicaziun a las medias dals 8 da settember 2022). Lur finamira èsi da reducir la ristga che lavinas sa distatgian en moda spontana ed uschia d'augmentar la segirezza per las utilisadras ed ils utilisaders dal traject. Las lavurs da construcziun han tranter auter cumpiglià la realisaziun da sis pitgas per siglientar lavinas. Il radar a lunga distanza, ch'è vegnì installà supplementarmain, surveglia davent da l'autra vart da la val – sin in territori da circa 10 kilometers quadrat – ils ulteriurs laviners che n'èn betg segirads tras las pitgas per siglientar lavinas. Uschia pon vegnir survegliads quasi tut ils laviners en il perimeter dal project.

La fin d'october 2022 èn vegnidas installadas las ultimas pitgas per siglientar lavinas, quai sut la direcziun da l'Uffizi da guaud e privels da la natira sco manader dal project. Pervia da las relaziuns topograficas en ils auts sur la via da Malögia è il plazzal stà ina sfida extraordinaria. Grazia a la buna collavuraziun da tut las persunas participadas pon ussa las pitgas per siglientar lavinas vegnir prendidas en funcziun a temp per la stagiun d'enviern.

Sistem d'infurmaziun per utilisadras ed utilisaders dal traject
Supplementarmain prevesa il UCB da realisar l'enviern che vegn in project da pilot sin il traject Segl – Malögia: In sistem d'infurmaziun adattà al lieu duai far attent gia ordavant las utilisadras ed ils utilisaders da las vias ad eventualas serradas dal traject. Cun inditgar las serradas prognostitgadas a temp, vulan ins facilitar a las utilisadras ed ils utilisaders dal traject d'organisar lur viadi.

Tenor infurmaziun dal UCB duai il sistem d'infurmaziun vegnir mess en funcziun anc la fin da december 2022 / il cumenzament da schaner 2023. Uschespert che quest sistem stat a disposiziun, vegn il UCB ad infurmar davart ils detagls.

Fotografia agiuntada:

Installaziun d'ina pitga per siglientar lavinas sur la via da Malögia.
© Caprez Ing. SA

Infurmaziuns davart las pitgas per siglientar lavinas:

• Roger Stäubli, schef Construcziun da vias, Uffizi da construcziun bassa, tel. +41 81 257 38 42, e-mail Roger.Staeubli@tba.gr.ch
• Gian Cla Feuerstein, manader regiunal, Uffizi da guaud e privels da la natira, tel. +41 81 257 50 90, e-mail Gian.Cla.Feuerstein@awn.gr.ch

Infurmaziuns davart il sistem d'infurmaziun:

• Reto Knuchel, inschigner chantunal, Uffizi da construcziun bassa, tel. +41 81 257 37 01, e-mail Reto.Knuchel@tba.gr.ch
• Gion Hagmann, schef dal Mantegniment da las vias, Uffizi da construcziun bassa dal Grischun, tel. +41 81 257 37 35, e-mail Gion.Hagmann@tba.gr.ch

Responsabladad: Uffizi da construcziun bassa