La dumengia en damaun hai dà ina crudada da grippa tranter l'access a Castaneda e Molina. Qua tras è la via da Calanca vegnida donnegiada fermamain e serrada cumplettamain per il traffic.
La dumengia en damaun curt avant las 06.30 hai dà ina crudada da grippa tranter l'access a Castaneda e Molina. Sin ina lunghezza da var 150 meters han crappuns cuvert la via. Las forzas d'acziun dals pumpiers da la Bassa Mesolcina e da Calanca, patruglias da polizia sco er collavuraturas e collavuraturs da l'Uffizi da construcziun bassa (UCB) èn stads al lieu. Tenor las emprimas enconuschientschas n'è nagin vegnì blessà. Ils vasts conturns dal lieu n'èn accessibels ni a pe ni cun vehichels. Collavuraturas e collavuraturs dal UCB ed in geolog han fatg in'emprima inspecziun gia la dumengia.
Distatga sin in'autezza da 360 meters
DPer valitar pli detagliadamain la situaziun ha il UCB consultà geologs. Tenor emprimas valitaziuns èn sa distatgads var 600 meters cubic material ord la paraid da grip. Il material è sa distatgà 360 meters sur la via, sin in'autezza da 1050 meters sur mar. La crappa ch'è crudada giu ha donnegià per part fermamain la via, ils mirs da sustegn da la vart da la muntogna e da la vart da la val sco er il cordun dal mir sin ina lunghezza da var 30 meters. Singuls crappuns èn crudads sur la via da Calanca fin giu en la Calancasca.
La situaziun da l'aura engrevgescha la valitaziun geologica dal privel
Il mument n'èsi betg cler, sch'i sa chattan ulteriuras parts da grip instabilas en la paraid ch'è passa 300 meters auta, che pudessan sa schliar pervia da la plievgia intensiva e crudar giu. Pervia da las fermas precipitaziuns e la tschajera ha l'examinaziun dal grip geologica necessaria anc betg pudì vegnir terminada. Particularmain vegni sclerì, sche anc ulteriuras parts da grip smanatschan da crudar giu. Pervia da la situaziun meteorologica vegn la controlla dal lieu da distatga tras il geolog fatga fin damaun, ils 6 da december, a mezdi.
Rumida e reparaziun da la via da Calanca
NSuenter las emprimas examinaziuns geologicas e suenter avair dà liber il lieu da privel, po la via da Calanca vegnir rumida cun chavaterras grevs e reparada provisoricamain previsiblamain il pli baud a partir da damaun mardi. Questas lavurs duran probablamain dus fin trais dis. Premess che la situaziun lubeschia quai, vegn in vial da la via da Calanca dà liber per il traffic avant la fin d'emna.
Il provediment dals vitgs ch'èn fin quel mument serrads giu è organisà e garantì tras las vischnancas. Durant las lavurs da rumida na datti nagina pussaivladad da sviar.
Fotografias agiuntadas::
Crudada da grippa 360 meters sur la via da Calanca.
Maletg: BauGrundRisk ScRL
Foto 2 – La via, ils mirs da sustegn ed il cordun dal mir èn per part vegnids donnegiads fermamain.
Maletg: Uffizi da construcziun bassa dal Grischun
Infurmaziuns:
- Christoph Nänni, manader dal sectur Geologia & privels da la natira, Uffizi da construcziun bassa dal Grischun, tel. +41 81 257 38 33, e‑mail Christoph.Naenni@tba.gr.ch
- Andrea Peduzzi, schef dal district 2 Mesauc, Uffizi da construcziun bassa dal Grischun, tel. +41 91 822 81 15, e‑mail Andrea.Peduzzi@tba.gr.ch
Responsabladad: Uffizi da construcziun bassa