La Regenza ha approvà las Prescripziuns chantunalas da pestga e fa uschia in ulteriur pass per schanegiar anc meglier las populaziuns da peschs. Las novas disposiziuns da pestga cumpiglian principalmain adattaziuns areguard il dumber da peschs ch'ins dastga pigliar sco er areguard il tractament dals peschs pigliads. En auas currentas dastgan vegnir pestgads maximalmain quatter peschs per di ed en lais maximalmain sis peschs per di a partir da la stagiun da pestga 2023. Questa restricziun suonda ina proposta ch'è vegnida acceptada da la radunanza da delegadas e da delegads 2022 da la Federaziun chantunala dals pestgaders grischuns.

Igl è il giavisch dal chantun che la pestga cun pertga vegnia realisada tenor ils princips suprems da la protecziun dals animals. En l'avegnir èsi perquai scumandà da transportar peschs pigliads vivs, cun excepziun da la frilla. E pigliar peschs d'estga dastgan mo pli persunas che han in attest davart las enconuschientschas da la pestga. Ulteriuras adattaziuns pertutgan l'introducziun da novs territoris da schanetg sco er regulaziuns spezialas per il diever d'estgas en ils dus lais «Doggiloch» a Claustra e «Pläviggin» a Küblis.

Per proprietaris da chasas e da bains immobigliars daventi pli attractiv da realisar mesiras da protecziun cunter privels da la natira vi da lur edifizis existents. La Regenza ha approvà l'augment da la tariffa da contribuziun da l'Assicuranza d'edifizis dal Grischun (GVG) a mesiras preventivas voluntaras, quai dad actualmain 25 pertschient sin 40 pertschient dals custs imputabels.

Gia dapi l'onn 2018 ha la GVG la pussaivladad da pajar contribuziuns finanzialas a mesiras preventivas voluntaras. Las contribuziuns vegnan pajadas per mesiras architectonicas vi d'edifizis existents ch'èn exponids a ristgas pli grondas da privels da la natira sco auas grondas, lavinas u bovas. La GVG po per exempel sustegnair finanzialmain la construcziun da mirs d'ala u l'installaziun da fanestras rinforzadas sco protecziun cunter lavinas sco er l'auzament da tumbins da glisch per proteger cunter inundaziuns.

Durant ils onns 2018 fin 2021 èn vegnidas inoltradas a la GVG en media set dumondas da contribuziun per onn. Uschia n'ha l'interess da las proprietarias e dals proprietaris da chasas e da bains immobigliars da realisar mesiras preventivas voluntaras insumma betg ademplì las aspectativas. Per consequenza n'ha fin ussa betg pudì vegnir cuntanschì l'effect preventiv. Per quest motiv ha la Regenza augmentà la tariffa da contribuziun da la GVG a mesiras preventivas voluntaras.

Access ad ina garascha cun sistem da protecziun cunter aua gronda Klappschott

La Regenza ha approvà la revisiun parziala da las Disposiziuns executivas tar la Lescha chantunala da sustegn. Uschia vegn il basegn fundamental per ils custs da viver auzà per il 1. da schaner 2023 per 2,5 pertschient

Suenter pli che in decenni cun pretschs stabils s'augmentan ils pretschs da consum dapi il cumenzament dal 2022 per l'emprima giada puspè cleramain. Chasadas cun meds limitads èn pertutgadas spezialmain da quest svilup. Latiers tutgan chasadas cun entradas bassas sco er chasadas che vegnan sustegnidas cun prestaziuns supplementaras u cun agid social. La capacitad da cumpra da questas chasadas duai vegnir segirada adequatamain, cun la finamira da prevegnir e da cumbatter la povradad.

Il Cussegl federal ha decidì ils 12 d'october 2022 d'adattar las rentas da la AVS/AI per il 1. da schaner 2023 al svilup actual dals pretschs e dals salaris e da las auzar per 2,5 pertschient. En consequenza d'ina tala cumpensaziun da la chareschia sto – tenor las Directivas concernent l'agid social (Directivas da la COSAS) – vegnir adattà er il basegn fundamental dals imports da l'agid social. La radunanza plenara da la Conferenza da las directuras e dals directurs chantunals dals affars socials ha pia recumandà ils 11 da november 2022 als chantuns, da far l'adattaziun e d'auzar il basegn fundamental per ils custs da viver per il 1. da schaner 2023 da 1006 francs sin 1031 francs.

La revisiun parziala da la Lescha dal persunal ch'è vegnida concludida dal Cussegl grond, entra en vigur sco previs il 1. da schaner 2023. Il termin da referendum è scadì ils 12 da december 2022. Entaifer quest termin n'èn vegnids inoltrads nagins referendums. Cun la revisiun parziala da l'Ordinaziun dal persunal ha la Regenza approvà las disposiziuns executivas per l'administraziun chantunala. L'attractivitad dal chantun sco patrun vegn rinforzada uschia sin in martgà da lavur che daventa pli e pli pretensius.

Las cundiziuns da lavur e d'engaschament vegnan meglieradas cunzunt per collavuraturas e collavuraturs cun famiglia, quai per ch'els restian en la plazza respectivamain possian vegnir gudagnads per la plazza. Els survegnan in sustegn finanzial per laschar tgirar lur uffants tras terzas persunas e pon reducir lur pensum da lavur suenter ina naschientscha u suenter in'adopziun. La lavur a temp parzial vegn promovida. Plinavant han collavuraturas e collavuraturs fin 49 onns da nov 5 emnas e tals da 50 fin 59 onns da nov 5,5 emnas vacanzas. Ultra da quai vegn il pensiunament flexibilisà supplementarmain. Il dretg chantunal dal persunal s'avischina anc pli fitg al dretg da lavur privat ed i vegn stgaffì in post d'annunzia independent per abus.

La Regenza ha prendì enconuschientscha dal rapport davart ils hearings «Diversitad da perspectivas» pertutgant la pandemia dal coronavirus en il chantun Grischun, ch'è vegnì redigì da l'Institut Fundaziun Dialog Ethik il november 2022. Il rapport s'occupa da la diversitad da las opiniuns durant la pandemia dal coronavirus en il chantun Grischun. En il rom da questa evaluaziun han gì lieu differents hearings cun represchentants da l'Uffizi federal da sanadad publica (UFSP), cun anteriurs commembers da la Science Task Force, cun commembers da la gruppaziun Aletheia sco er cun ina gruppa eterogena da persunas ch'èn criticas envers las mesiras. Ils hearings han gì la finamira da verifitgar las differenzas eticas-socialas en la societad e da pussibilitar uschia il dialog tranter las differentas represchentantas ed ils differents represchentants d'interess.

L'Uffizi da militar e da protecziun civila examinescha las recumandaziuns ch'èn cuntegnidas en il rapport e che pertutgan l'administraziun chantunala. Sch'el vegn a la conclusiun ch'igl exista in basegn d'agir correspundent, sto l'uffizi integrar quai cun elavurar la valitaziun da la Scola politecnica federala.

Rapport dals hearings «Diversitad da perspectivas» pertutgant la pandemia dal coronavirus

La Regenza ha approvà il project «Protecziun cunter crudadas da crappa Tuma Padrusa» da la vischnanca da Domat ed ha deliberà ina contribuziun chantunala da maximalmain 105 000 francs per quest intent.

Il territori da project sa chatta a la spunda sid da la collina «Tuma Padrusa». Questa collina s'auza per 40 meters sur la planira da la Val dal Rain da Cuira ed è situada amez il territori d'abitar da la vischnanca da Domat. La spunda sid cuntegna gondas da blocca e survart grippa localmain fitg lucca. Sin quests secturs da la spunda èn vegnidas registradas en il passà pliras crudadas ch'èn arrivadas sur la Via Carpera fin sin las plazzas da parcar e fin als access da las garaschas dals edifizis situads al sid. In rempar ch'era vegnì construì ils onns 1980, protegiva fin ussa la Via Carpera ed ils edifizis d'abitar cunter crudadas da crappa e da blocca. En il fratemp è il rempar emplenì e per part donnegià, uschia ch'el na fa betg pli grond effect.

En il rom dal project qua avant maun duai il rempar existent vegnir demontà, ed al medem lieu duai vegnir construì in nov rempar cun dimensiuns tenor las basas actualas. Ils custs spetgads importan 130 000 francs.

Ord la finanziaziun speziala Sport (FS Sport) conceda la Regenza contribuziuns en la summa dad 1 milliuns francs a las commembras ed als commembers da l'Associaziun grischuna da sport (AGS). Las associaziuns da sport dal Grischun prestan ina lavur da basa impurtanta per promover il sport da massa ed il sport da prestaziun. Cun las contribuziuns pauschalas per la lavur generala da las associaziuns e da las uniuns sustegna il chantun 43 organisaziuns da sport en lur prestaziuns a favur da las uniuns da sport dal Grischun.