Il chantun Grischun ha cumprà circa 0,5 % da las aczias da la Societad naziunala da raits d'electricitad Swissgrid SA. La participaziun dal chantun a l'acziunariat da la Swissgrid SA rinforza l'impurtanza dal chantun sco chantun d'aua e sco territori cun numerus implants da producziun d'electricitad en l'interess dal provediment d'electricitad en il Grischun ed en Svizra.

La rait da transmissiun d'electricitad en Svizra è reglada tras lescha e vegn manada da la Societad naziunala da raits d'electricitad Swissgrid SA. La Swissgrid SA ha l'incumbensa da procurar ch'il manaschi da la rait da transmissiun saja effizient, fidà e libers da discriminaziuns. Uschia ha ella da garantir la basa essenziala per il provediment segir da la Svizra cun electricitad. La gronda part dal chapital d'aczias è directamain u indirectamain en possess dals chantuns e da las vischnancas. Sur sias ovras partenarias è il chantun Grischun participà fin ussa mo indirectamain a la Swissgrid SA.

Il chantun Grischun cumpra circa 0,5 % da las aczias da la Swissgrid SA
Tenor la Lescha federala davart il provediment d'electricitad èn las Ovras electricas dal Rain posteriur SA (OERP) stadas obligadas da transferir lur parts da la rait da transmissiun a la Swissgrid SA. Persuenter è la OERP daventada il cumenzament da l'onn 2013 acziunaria da la Swissgrid SA. Suenter la rectificaziun dals rendaquints correspundents ha la OERP offrì al chantun ed a ses ulteriurs acziunaris da surpigliar las aczias da la Swissgrid che tutgan a la OERP. La Regenza dal chantun Grischun ha concludì da cumprar sia cumpart da las aczias da la Swissgrid. Tras quai è il chantun participà da nov directamain a la Swissgrid SA.

Gronda impurtanza da la cumpra d'aczias per il Grischun
La rait da transmissiun d'electricitad è ina da las infrastructuras las pli impurtantas da la Svizra. Sco chantun d'aua e sco territori cun numerus implants da producziun d'electricitad e cun impurtantas lingias da la rait naziunala da transmissiun ha il chantun in interess particular da gidar a segirar la rait da provediment e da pudair sa far valair en questa moda. Tras la cumpra d'aczias da la Swissgrid e tras la participaziun directa a la Swissgrid SA, che resulta da la cumpra, ha il chantun mess in ulteriur crap da fundament adattà per quest intent. La participaziun permetta al chantun da far valair ses interess en il futur directamain en la radunanza generala da la Swissgrid SA.

Per il chantun Grischun è la surpigliada da las aczias da la Swissgrid er interessanta sco investiziun finanziala. Ella succeda en in martgà regulà che dastgass garantir er vinavant dividendas attractivas e duraivlas cun ina relaziun favuraivla tranter las ristgas e la rendita. A lunga vista servan las aczias da la Swissgrid a la diversificaziun dal portfolio existent da las participaziuns ad ovras idraulicas. La cumpra gida pia er a realisar la Strategia grischuna concernent la forza idraulica 2022–2050.

Infurmaziuns:

• Cusseglier guvernativ dr. Christian Rathgeb, schef dal Departament da finanzas e vischnancas, e‑mail Christian.Rathgeb@dfg.gr.ch
• Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel fin las 10.00), e‑mail Mario.Cavigelli@diem.gr.ch

Responsabladad: Regenza