Ils uffizis cumpetents han tratg bilantscha da las mesiras immediatas ch'èn vegnidas prendidas l'onn 2022 per proteger las muntaneras. Ultra da cussegliar ils manaschis e da liquidar las stgarpadas è l'onn 2022 stà caracterisà da la realisaziun da las mesiras immediatas.

Sco consequenza dals donns considerabels d'animals da niz èsi vegnì disponì da sajettar tut en tut nov lufs. Otg lufs èn vegnids sajettads fin ussa. Parallelamain a l'augment dal dumber da lufs han ins stuì constatar per l'emprima giada passa 500 animals da niz stgarpads, quai ch'è il dubel da l'onn precedent.

Bilantscha da las mesiras immediatas per la protecziun da muntaneras
Pervia da la preschientscha dal luf e pervia dals conflicts respectivs ha il parlament incumbensà l'Uffizi federal d'ambient l'onn 2022 da metter a disposiziun als chantuns meds finanzials supplementars en l'autezza da 5,7 milliuns francs per realisar las mesiras per la protecziun da muntaneras. En stretga collavuraziun tranter ils posts spezialisads dal Plantahof, da l'Uffizi d'agricultura e da geoinfurmaziun e da l'Uffizi da chatscha e pestga han ins pudì approvar durant la stad dumondas en la dimensiun da tut en tut stgars 1,5 milliuns francs per 82 manaschis d'alp. 23 manaschis d'alp han survegnì agid finanzial tranter auter per cumprar e per transportar quartiers mobils per pasturs, 77 manaschis per cumprar saivs e 27 manaschis per indemnisar lavurs dal persunal auxiliar per la protecziun da muntaneras. Las mesiras èn vegnidas finanziadas per 80 pertschient da l'Uffizi federal d'ambient e per 20 pertschient dal chantun sur l'Uffizi d'agricultura e da geoinfurmaziun.

Lufs pli savens en vischinanza dals abitadis durant l'enviern
Il cumenzament da l'enviern sa trategnan ils lufs pli savens en vischinanza dals abitadis. Uschia reageschan ils lufs sin la dischlocaziun dals animals da preda. Ch'ils lufs sa trategnan en vischinanza dals abitadis n'è da princip betg privlus per l'uman. Sin sia pagina d'internet (www.ajf.gr.ch) metta l'Uffizi da chatscha e pestga a disposiziun infurmaziuns davart il cumportament en cas d'in inscunter cun in luf. Per che la surveglianza da chatscha possia giuditgar permanentamain la situaziun duain inscunters a curta distanza cun in luf u observaziuns da lufs en vischinanza dals abitadis vegnir annunziads immediatamain ad ella.

Infurmaziuns:

• Tema luf: Arno Puorger, collavuratur academic Animals da rapina gronds, Uffizi da chatscha e pestga, tel. +41 81 257 87 67 (cuntanschibel da las 8.00 fin las 10.00), e‑mail Arno.Puorger@ajf.gr.ch
• Tema protecziun da muntaneras: Batist Spinatsch, manader Cussegliaziun e furmaziun supplementara, Plantahof, tel. +41 81 257 60 61 (cuntanschibel da las 8.00 fin las 10.00), e‑mail Batist.Spinatsch@plantahof.gr.ch

Responsabladad: Uffizi da chatscha e pestga