En il rom da la revisiun parziala da l'Ordinaziun davart la realisaziun da la public corporate governance (PCG) adattescha la Regenza las proceduras da recrutaziun e d'elecziun per mandatarias e mandataris.

L'Ordinaziun davart la realisaziun da la PCG vul ina relaziun equilibrada tranter la gestiun e la controlla da las participaziuns dal chantun Grischun. En la sessiun d'october ha il Cussegl grond tractà la modificaziun da l'incumbensa da la fracziun da la PPS concernent in termin da carenza ed ina pensiun per anteriurs cussegliers guvernativs. L'Ordinaziun chantunala davart la PCG vegn ussa adattada correspundentamain ed entra en vigur il 1. da schaner 2023.

Naginas nominaziuns e propostas electoralas durant il temp d'uffizi da commembras e commembers da la Regenza
La Regenza è cumpetenta per nominar las represchentanzas chantunalas en ils organs strategic-directivs da participaziuns, d'uniuns e da fundaziuns ubain d'investiziuns da la facultad finanziala. Per evitar eventuals conflicts d'interess na dastga la Regenza betg nominar ed er betg proponer per l'elecziun ina da sias commembras u in da ses commembers.

Procedura da recrutaziun e da selecziun averta e transparenta
Represchentanzas chantunalas che vegnan stgaffidas da nov u che ston puspè vegnir occupadas, vegnan publitgadas uffizialmain. Tras questa procedura averta e transparenta vegni garantì, che tut las persunas interessadas e qualifitgadas survegnan la pussaivladad da candidar per l'uffizi. En cas da posts vacants impurtants vegn consultada ina persuna spezialisada, quai per mantegnair l'objectivitad necessaria. Las nominaziuns da las represchentanzas chantunalas vegnan mintgamai communitgadas uffizialmain en furma adattada.

Infurmaziuns:

Cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch

Responsabladad: Regenza