A partir d'immediat sustegna il Post spezialisà per l'integraziun las persunas cun status da protecziun «S» tar la tschertga d'ina plazza da lavur. Per quest intent han duas ulteriuras jobcoachas ed in ulteriur jobcoach cumenzà lur lavur il schaner. Cun lur agid duain dapli Ucranaisas ed Ucranais chattar la via en l'activitad da gudogn. A medem temp duain ils diploms e las experientschas professiunalas, ch'ellas ed els han fatg en lur patria, vegnir tratgas a niz meglier – betg sco ultim er per cumbatter la mancanza da persunas spezialisadas en il Grischun.

Bleras da las persunas ch'èn fugidas da l'Ucraina han nizzegià ils ultims mais per emprender intensivamain la lingua. L'onn passà ha il Post spezialisà per l'integraziun engrondì la purschida da curs da lingua en l'entir Grischun. «Sco proxim spetga l'integraziun en il martgà da lavur», di Felix Birchler, manader dal Post spezialisà per l'integraziun.

Da las circa 1400 persunas che tschertgan protecziun e che vivan en il chantun Grischun, lavuran actualmain mo 12,6 pertschient. Cumbain che bleras da las persunas fugidas da l'Ucraina han fitg bunas qualificaziuns ed interessantas experientschas professiunalas, è la gronda part dals engaschaments vegnida fatga en secturs sco la gastronomia u nettegiaments.

Jobcoachs gidan a far il pass en il mund da lavur
Il Post spezialisà per l'integraziun ha perquai sviluppà e realisà durant las ultimas emnas ina purschida per persunas cun il status da protecziun «S». Duas ulteriuras jobcoachas ed in ulteriur jobcoach evalueschan cun las clientas ed ils clients lur scolaziuns ed enconuschientschas preliminaras, lur potenzial da svilup sco er las pussaivladads e las pretensiuns per entrar en il martgà da lavur svizzer. Ellas ed el gidan dentant er a tschertgar fufragnadis, praticums u engaschaments en las branschas giavischadas. Er a las patrunas ed als patruns che vulan engaschar e/u scolar Ucranaisas ed Ucranais, stattan las jobcoachas ed il jobcoach a disposiziun cun infurmaziuns e sustegn.

Tras la nova purschida da sustegn dal chantun duai la cumpart da las persunas cun status da protecziun «S» che ha in'activitad da gudogn vegnir augmentada ils mais vegnints. La meglra coordinaziun dals potenzials e dals profils professiunals da las Ucranaisas e dals Ucranais cun ils basegns da las patrunas e dals patruns grischuns duai però er prestar ina contribuziun preziusa cunter la mancanza da forzas spezialisadas e da forzas da lavur en diversas branschas.

Infurmaziuns:

Felix Birchler, manader dal Post spezialisà per l'integraziun, tel. +41 81 257 36 84 (cuntanschibel da las 8.00 fin las 9.30 e da las 11.00 fin las 12.00), e‑mail Felix.Birchler@afm.gr.ch

Responsabladad: Uffizi da migraziun e da dretg civil