La Regenza garantescha a la Swissrehamed ScRL ina contribuziun chantunala da maximalmain 9900 francs per examinar la realisabladad dal «Competence Center Exergames». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Il project è budgetà cun 25 500 francs.

La digitalisaziun influenzescha pli e pli fitg la concepziun da nossa vita. Uschia mussa la tendenza actuala da fitness medicinala ina fusiun dal martgà da sport e dal provediment medicinal. Novas tecnologias procuran per purschidas digitalas da trenament e da terapia. En il rom dal project actual duai vegnir examinà, sch'igl è raschunaivel da domiciliar in tal center da cumpetenzas (Competence Center Exergames, CCE) en il chantun Grischun. Sut la direcziun da la partenaria economica Swissrehamed ScRL e cun la participaziun da la Scola auta spezialisada dal Grischun duain expertas spezialisadas ed experts spezialisads examinar e valitar il niz presumà, quai a chaschun da dus lavuratoris.

Ulteriuras infurmaziuns: https://grdigital.digital

Sin l'areal da l'anteriura plazza aviatica militara a San Vittore ha lieu mintgamai la primavaira in champ per sgular cun aviuns senza motor che dura var duas emnas. Perquai che la Confederaziun smetta uffizialmain ses manaschi sin la plazza aviatica militara, n'exista nagina pussaivladad legala e da la planisaziun dal territori pli per organisar regularmain quests champs.

En il rom d'ina consultaziun da l'Uffizi federal d'aviatica civila (UFAC) prenda la Regenza grischuna posiziun davart il diever futur dal heliport San Vittore. Ella beneventa che la Confederaziun veglia vinavant garantir l'organisaziun dal champ per sgular cun aviuns senza motor. Per quest intent duai il perimeter dal heliport vegnir engrondì per l'areal ch'è necessari per ils sgols cun aviuns senza motor. Ils stabiliments necessaris duain perquai pudair vegnir endrizzads temporarmain per la durada dal champ, vul dir durant maximalmain 18 dis per onn. L'utilisaziun da l'areal sa restrenscha dentant al champ per sgular cun aviuns senza motor.

© Andrea Badrutt, Cuira

En il rom dal project per il svilup regiunal (PSR) ha la Regenza concedì il favrer 2021 ina contribuziun chantunala per la senda da viandar a lunga distanza «Parc Ela-Trek» (communicaziun da la Regenza dals 4 da favrer 2021). Questa senda duai ussa survegnir in ulteriur project parzial, numnadamain la «Chamona da muntogna Tigias Plang Faller». Per questa chamona ha la Regenza concedì ina contribuziun chantunala da var 43 500 francs. Quai sut la premissa ch'er la Confederaziun concedia ina contribuziun da var 54 000 francs al project cuminaivel a favur dal svilup regiunal.

L'Alp Faller è in lieu d'etappa impurtant sin il Parc Ela-Trek. Da Radons maina il trek sur la Fuorcla Starlera e sur la Fuorcla Curtegns sin l'Alp Faller. Il traject è da gronda impurtanza per il turissem da viandar, per la cuntrada natirala e per l'istorgia culturala e contribuescha essenzialmain al success futur dal Parc Ela-Trek e pia a l'entira valurisaziun per lung dal trek. En l'anteriura chamona da signuns e da pastriglia vegn construì in alloschi cun dudesch plazzas da durmir. La nova purschida sa drizza als giasts che fan turas da plirs dis e che pernotteschan mintgamai ina notg. La chamona vegn concepida sco chamona d'autoprovediment e vegn ad esser ospitada durant las fins d'emna sco er durant l'auta stad ed il settember. L'alimentaziun cun products regiunals vegn la famiglia ospitanta a porscher, quai en collavuraziun cun ils bains purils da la regiun e cun l'uniun PRE Parc Ela-Trek.

© Geschäftsstelle Verein PRE Parc Ela Trek

A la vischnanca da Seewis en il Partenz conceda la Regenza ina contribuziun chantunala da maximalmain 190 080 francs per mantegnair il mir da defensiun da la ruina dal chastè Solavers.

Il stadi architectonic da la ruina dal chastè Solavers è fitg divers. Dal tuttafatg intact e betg segirà è il grond mir da defensiun, ch'è il pli vast dals elements mantegnids. Numerusas foras da travs, in nas dal mir fermamain scrudà, chavas verticalas e fastizs da construcziuns e d'edifizis annexs da lain renvieschan ad ina istorgia da construcziun multifara ed ad ina interessanta furma oriunda da l'edifizi. La curuna dal mir fermamain disfatga, plantaziuns vi dal mir ed il grond dumber da crappa crudada al pè dal mir signaliseschan la necessitad da mantegnair il mir da defensiun a Solavers, quai betg sco ultim per motivs da segirezza. Ils custs totals importan 633 580 francs. Las lavurs da renovaziun ch'èn colliadas cun il project vegnan accumpagnadas e sustegnidas da la Tgira da monuments. Las lavurs da documentaziun surpiglia il Servetsch archeologic. En quest connex vegn la ruina dal chastè Solavers er a vegnir messa sut protecziun da monuments.