Sin invit da la Regenza grischuna ha la Regenza dal chantun Son Gagl visità ier saira il chantun Grischun. En il rom dal discurs da lavur constructiv a La Punt/Rehanau èn vegnids tractads differents temas interchantunals.

Sin sia visita en il chantun Grischun è la Regenza da Son Gagl vegnida manada dal president da la Regenza Fredy Fässler. El è vegnì accumpagnà da las cusseglieras guvernativas Susanne Hartmann e Laura Bucher, dals cussegliers guvernativs Stefan Kölliker, Beat Tinner, Marc Mächler e Bruno Damann sco er dal chancelier Benedikt van Spyk e da la manadra da las relaziuns externas Sarah Hauser.

Traffic, furmaziun e sanadad sco temas interchantunals
Las Regenzas dals chantuns Son Gagl e Grischun èn sa scuntradas per in discurs da lavur en il chastè da Rehanau. En il center dals discurs èn stads differents temas interchantunals en ils secturs traffic, furmaziun e sanadad.

Concernent il traffic èn vegnids discutads la reducziun dal temp da viadi sin la viafier tranter Cuira e Turitg sco er il traffic da guntgida da la A13 tras ils vitgs en la regiun da Sargans. Il discurs da lavur è ultra da quai stà l'occasiun per discutar davart l'annunzia dal chantun Son Gagl per realisar il campiunadi europeic da mastergns EuroSkills 2029. Medemamain han las participantas ed ils participants discurrì davart il partenadi planisà da las scolas autas da pedagogia dal Grischun (SAPGR) e da Son Gagl (SAPSG) sco er davart la pussaivladad d'ina scolaziun cuminaivla da spezialistas e spezialists dal register funsil en ils chantuns da la Svizra Orientala. En il sectur da sanadad è la medischina fermamain spezialisada (MFS) stada il tema da discussiun central.

Fotografias agiuntadas:

Ils presidents da las Regenzas Peter Peyer (a sanestra) e Fredy Fässler davant il chastè da Rehanau

Infurmaziuns:

President da la Regenza Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch

Responsabladad: Regenza