Per il project «Realisaziun dal turissem cultural Grischun 2023 – 2026» ha la Regenza concedì a la Cuminanza d'interess Turissem cultural Grischun ina contribuziun chantunala da totalmain 1,65 milliuns francs en il rom da la Nova politica regiunala da la Confederaziun (NPR). La contribuziun NPR vegn pajada mintgamai per la mesadad da la Confederaziun e dal chantun.

En il rom dal project da plirs onns vul la Cuminanza d'interess Turissem cultural posiziunar il Grischun sco ina da las regiuns directivas per il turissem cultural en las Alps. Tras purschidas turisticas culturalas d'auta qualitad duai vegnir augmentada la valurisaziun en il chantun. Sco ulteriuras finamiras prevesa il project da mantegnair e da stgaffir plazzas da lavur directas ed indirectas en il sectur dal turissem cultural. Las raits tranter las acturas ed ils acturs, la cooperaziun tranter organisaziuns culturalas e turisticas, il svilup cuminaivel da savida ed ina preschientscha ferma e structurada duain augmentar la visibilitad sin ils martgads e procurar per offertas concretas. Qua na sa tracti betg da la promoziun chantunala da la cultura. Anzi, las plattafurmas da l'ambient cultural ch'existan gia u che ston anc vegnir implementadas, duain vegnir commerzialisadas, quai a favur da l'economia culturala e turistica grischuna. La Cuminanza d'interess Turissem cultural Grischun sa cumpona da l'Institut per la perscrutaziun da la cultura grischuna, da l'Uniun Grischun Vacanzas, dal secretariat da la marca «graubünden» sco er dal Post da perscrutaziun per turissem e svilup persistent da la ZHAW Vargistagn.

© mira!cultura, Adrian Aregger

La Regenza ha dà glisch verda per cofinanziar dus projects da protecziun cunter crudadas da crappa sin la lingia da la Viafier retica.

Il project «Protecziun cunter crudadas da crappa Campascio, Brusio» pertutga il territori d'abitadi sut Viano, ch'è periclità da vegl ennà tras crudadas da crappa. L'ultim grond eveniment è capità l'onn 2008 sin l'autezza dal viaduct a spirala ed ha tutgà la Viafier retica, la via chantunala ed il territori d'abitadi. Silsuenter ha la vischnanca da Brusio elavurà ina charta da privels. Quella mussa che cunzunt la Viafier retica ha in grond deficit da protecziun, perquai che lungs trajects da la lingia da viafier sa chattan directamain al pe da la costa. Il project serva perquai en emprima lingia a proteger la lingia da viafier da San Murezzan a Tiraun. Previs èn in rempar da protecziun cunter crudadas da crappa, novs binaris sin il rempar sco er las installaziuns respectivas da la tecnica da viafier. Il project vegn realisà en quatter etappas da construcziun e duai vegnir terminà l'onn 2026. Il chantun sa participescha cun ina contribuziun da var 8,43 milliuns francs als custs totals imputabels dal project en l'autezza da 10,7 milliuns francs.

Ultra da quai ha la Regenza concedì ina contribuziun chantunala da var 2,75 milliuns francs per il project «Protecziun cunter crudadas da crappa Aulta, Trin». I sa tracta d'in project da protecziun cunter crudadas da crappa en il sectur Las Ruinas ed Aulta sin la lingia da la Viafier retica tranter Rehanau e Mustér, cun custs totals imputabels da var 3,66 milliuns francs. Il project previs è in da trais projects parzials che duain proteger en moda cumplessiva la lingia tranter Trin e Versomi cunter crudadas da crappa. Quest project parzial cumpiglia tut en tut diesch raits cunter crudadas da crappa. Il project vegn realisà en duas etappas fin l'onn 2024.

La Regenza ha garantì als purtaders dal Center da furmaziun Palottis a Schiers ina contribuziun chantunala da construcziun da maximalmain 250 800 francs per il project «Reparaziun da la cuschina da scola 1».

La cuschina da scola 1 en il tract B era vegnida construida l'onn 1957. Diversas materialias, apparaturas e surfatschas èn defectas e na correspundan betg pli a las pretensiuns d'ozendi envers ina cuschina da scola moderna ed igienicamain irreproschabla. Pervia da la vegliadetgna da las cumponentas n'èn reparaturas per gronda part betg pli pussaivlas. En la cuschina da scola actuala èn installadas sis cuschinas en furma dad U. En il rom dal project èn planisadas tschintg inslas da cuschinar ch'èn montadas vi da la paraid. La sisavla cuschina actuala fa ultra da quai plazza ad ina gronda maisa cun pussaivladads da seser e da mangiar. La midada dal concept da cuschina ha plinavant per consequenza che tut las colliaziuns da la tecnica da chasa sco er las cuvridas dal palantschieu ston vegnir refatgas. Perquai vegnan er adattadas las colliaziuns da las paraids e las surfatschas dal palantschieu sura.

©Bildungszentrum Palottis

La Regenza ha concedì a la secziun Bernina dal CAS ina contribuziun da maximalmain 100 000 francs or da la finanziaziun speziala Sport. La contribuziun serva a sanar il «Rifugio Saoseo» en la Val da Camp. Igl è previs da renovar il provediment d'energia, la cuschina e la serenera sco er d'agiuntar in deposit supplementar.