Er tgi che posseda ina permissiun da domicil (permissiun C) en il chantun Grischun, po s'annunziar en il futur per in test da qualificaziun sco aspiranta u aspirant da polizia. La Regenza ha concludì d'adattar correspundentamain la procedura da recrutaziun.

Tar la Polizia chantunala dal Grischun lavuran tut en tut 400 polizistas e polizists. Mintga onn absolvan 15 fin 25 aspirantas ed aspirants dal Grischun la scolaziun da polizista u polizist a las scolas da polizia en la Svizra Orientala ed en il Tessin.

En il Grischun ha la Polizia chantunala ina incumbensa multifara e procura per segirezza, quietezza ed urden per las abitantas ed ils abitants, per ils giasts da vacanzas, per las participantas ed ils participants da congress e per las passantas ed ils passants. Al cunfin naziunal collavura ella ultra da quai cun las organisaziuns partenarias dals pajais vischins ed entaifer l'administraziun – en tschertas tematicas – cun differents posts da servetsch. «Il corp da polizia è francà en tut las regiuns ed è sa sviluppà vinavant fermamain durant ils ultims onns», di il cumandant da polizia Walter Schlegel. Ultra dal mintgadi da lavur varià porscha la Polizia chantunala dal Grischun er numerusas pussaivladads per sa sviluppar vinavant en la professiun.

Adattaziun da la procedura da recrutaziun
Per pudair recrutar avunda forzas giuvnas han blers corps da polizia ed er la Polizia chantunala dal Grischun adattà u abolì ils ultims onns lur pretensiuns sco per exempel la grondezza minimala e la vegliadetgna. Ils corps da polizia dals chantuns Basilea-Citad, Sviz, Neuchâtel e Giura èn gia in pass pli enavant ed han extendì la premissa formala da la naziunalitad svizra sin la permissiun da domicil (permissiun C), quai per render accessibla l'attractiva professiun da polizista u polizist ad in circul da persunas pli vast.

Ussa adatta er il Grischun questas prescripziuns. Las autas pretensiuns persunalas a las futuras polizistas ed als futurs polizists vegnan mantegnidas. En il futur pon dentant er persunas che possedan ina permissiun da domicil, s'annunziar en il Grischun tar la Polizia chantunala per il test da qualificaziun per la scolaziun da 2 onns.

Fotografia agiuntada:

Infurmaziuns:

• President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 10.30 fin las 11.30), e‑mail Peter.Peyer@djsg.gr.ch
• Walter Schlegel, cumandant da la Polizia chantunala dal Grischun, tel. +41 81 257 79 50 (cuntanschibel da las 10.00 fin las 12.00), e‑mail Walter.Schlegel@kapo.gr.ch

Responsabladad: Regenza