La Regenza ha approvà il project d'exposiziun per la construcziun dal sviament da La Punt cun in tunnel d'ina lunghezza da circa 600 meters. Uschia vegn cuntanschì in term impurtant per meglierar la situaziun dal traffic. Las lavurs da construcziun dal project che custa 83,5 milliuns francs duain cumenzar la primavaira 2025 e durar var 8 onns.

Gia il cumenzament dals onns 1980 eri vegnì considerà da construir in sviament da La Punt. L'onn 2014 han ins lura reprendì quest project ed al adattà fin il november 2015 a las pretensiuns dal temp. Sin fundament dals resuns e dals recurs è il project da sviament vegnì surlavurà essenzialmain e vegnì exponì da nov l'atun 2018. Suenter avair absolvì tut ils pass da procedura ha il project ussa pudì vegnir approvà da la Regenza. Cun la construcziun dal sviament vegn la stretga en il center dal vitg deliberada dal traffic da transit. Quai augmenta la segirezza per las persunas ch'èn da viadi a pe u cun il velo, ma er per il traffic local. Plinavant meglierescha il sviament la qualitad da viver e d'abitar a La Punt Chamues-ch. Il project da construcziun custa 83,5 milliuns francs.

Tunnel da sviament e nova punt sur l'En
Il sviament planisà sa sparta a l'ur sid dal vitg da la vart sanestra da la via d'Engiadina actuala, quai suenter avair passà la cuntrada alluviala Arvins ch'è degna da vegnir protegida. El maina en in tunnel d'ina lunghezza da 584 meters – l'element central dal project – e passa sut il center dal vitg e sut l'Ova d'Alvra en ina leva curva a dretga. Suenter il tunnel maina la via per lung da la via d'Engiadina existenta, traversa suenter ina curva a dretga l'En e sbucca sin l'autezza da Madulain suenter ina curva a sanestra puspè en la via d'Engiadina.

En il rom dal project remplazza l'Uffizi da construcziun bassa er la punt da l'En existenta tras ina punt nova d'ina lunghezza da var 55 meters. Il trassé adattà maina en stortas cun radius optimads sur l'En. Quai meglierescha la circulaziun dal traffic e minimescha il privel d'accidents da glischnar e d'accidents individuals. La punt da lain per il traffic betg motorisà ch'è avant maun in toc dal flum giu vegn mantegnida.

Differentas soluziuns da cuntinuaziun per las vischnancas e per la via dal Pass da l'Alvra
La vischnanca da La Punt Chamues-ch sco er la via dal Pass da l'Alvra vegnan colliadas a l'ur nord dal vitg tras la rundella Gianda cun la via d'Engiadina. Il vitg da Madulain survegn in nov access da «T» che po vegnir duvrà da tuttas duas varts. Sur il vial per sviar a dretga pon las viagiaturas ed ils viagiaturs che vegnan da Bever a La Punt Chamues-ch bandunar il sviament gia davant il vitg, senza stuair ir tras il tunnel. Er il traffic betg motorisà vegn manà sur quest access en direcziun dal center dal vitg.

Premess ch'i na vegnian inoltrads nagins recurs tar la Dretgira administrativa dal Grischun entaifer il termin da 30 dis, vegn l'Uffizi da construcziun bassa a cumenzar cun l'elavuraziun da la projectaziun d'execuziun. Igl è previs da cumenzar la primavaira 2025 cun las lavurs da construcziun.

Fotografias agiuntadas:

Plan da survista dal sviament da La Punt

La Punt Chamues-ch ord vista da la via dal Pass da l'Alvra. ©Fabian Gattlen, Engiadina San Murezzan turissem.

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 11.00 fin las 12.00), e‑mail Carmelia.Maissen@diem.gr.ch
• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 08.30 fin las 11.00 e da las 13.30 fin las 15.00), e‑mail Reto.Knuchel@tba.gr.ch
• Roger Stäubli, schef Construcziun da vias / substitut da l'inschigner chantunal, Uffizi da construcziun bassa, tel. +41 81 257 38 42 (cuntanschibel da las 08.00 fin las 09.00 e da las 13.30 fin las 15.30), e‑mail Roger.Staeubli@tba.gr.ch

Responsabladad: Regenza